E set pa tacha Ontvanger a lastra hinter Servisio di Impuesto i  Kòrsou  Rapòrt SOAB ku nòmber kompletu di hende; un fayo garafal! 

 

 

21 òktober Ontvanger di Kòrsou  

E set pa tacha Ontvanger a lastra hinter Servisio di Impuesto i  Kòrsou 

Rapòrt SOAB ku nòmber kompletu di hende; un fayo garafal! 

Un bia mas mi a tuma nota di publikashon den medionan di komunikashon kaminda ta trata na  tacha i mancha Ontvanger di Kòrsou. Ta sumamente fásil pa ataká un persona ku no por defendé su mes kompletamente, debí na su obligashon di sekresia. E parti mas tristu di e asuntu aki ta,  ku no ta solamente Servisio di Impuesto di Kòrsou, i tur su empleadonan ku ta haña un mancha  negativo innesesario, pero ta hinter Kòrsou ta keda lastrá den lodo ku tur e konsekuensianan ku esei ta trese kuné. Mehorashon di Servisio di Impuesto ta algu ku definitivamente ta nesesario, i  esei niun hende paden òf pafó di e organisashon lo ninga, pero e manera kon ta presentá esaki,  basá riba un rapòrt di SOAB ku a wordu saka for di contexto. Ta pa e motibo aki ta pone ku mi  mester duna un reakshon mas amplio na mi komunidad 

Den e kaso spesífiko aki, manera tur hende por a tuma nota den prensa, ta trata un “naheffing”  riba derecho di importashon i akseins (invoerrechten en accijnzen). Ta straña mi hopi ku den e  rapòrt di SOAB, ku un hende a lèk na prensa, ta hasi menshon di un pagadó di belasting na su  nòmber kompletu. Esei ta un fayo garafal di e obligashon di sekresia, loke ta hopi lamentabel,  anto mas ainda ora tuma nota ku e publikashon aki a kondusí na publisidat internashonal pa kua  e kompania por sufri daño. 

E echonan relatá den e rapòrt di SOAB ku a lèk ta lo siguiente;  

Duana a emití un desishon dia 29 di yüni 2016 kontra di e “expediteur” pa un suma di alrededor  di 1.15 mion florin, oumentá ku un but di 300%. Dia 27 di yüli 2016 un “bezwaarschrift” pro  forma a keda entregá i dia 9 di ougùstùs 2016 un “bezwaarschrift” adishonal a keda entregá. A  tuma lugá un “hoorziting” na yanüari 2017. E desishon riba “bezwaarschrift” ta fechá kuater aña despues, esta 25 di mei 2021. For di e fecha di e desishon, ta kore un periodo di apelashon di  seis siman, loke ta nifiká ku defakto ta na prinsipio di yüli 2021 por a kobra e “aanslag”. 

Konforme e maneho di kobransa normal, for di momentu ku a bini un “bezwaar”, Ontvanger  mester a suspendé e proseso aki te na momentu ku e desishon pa kobra bira irevokabel.  Sinembargo, Ontvanger for di 2018 a kumbiní i a inisiá un areglo di pago temporal ku e kliente exigiendo un anticipio di 30.000,- y un areglo di Naf 5000.- i Naf 3000,-. Mas despues e  inspektor di duana a redusí e “aanslag” ku tabata Naf 4.6 mion florin te mas o ménos Naf 2.3  mion. 

Tur esaki a tuma lugá promé ku e desishon di minister di Finansa di 31 di yanüari 2023 kaminda  el a anunsiá ku no por kobra niun “aanslag” ku fecha 2017 òf mas bieu. Desishonnan di korte a  mustra, ku apesar di hopi esfuerso di parti di Ontvanger, no por a kobra e sumanan ei mas.  Sinembargo, trahando proaktivo, den e kaso spesífiko aki, a logra kobra for di 2017 180.000 

florin, te na momentu ku e minister, ku su deklarashon den media a pone ku no por a kobra e  sènnan mas. Pues no ta Ontvanger ta esun ku a okashoná e pèrdida di entrada aki. Dikon, esaki  no ta asina eksplísito formulá den e rapòrt di SOAB ta pa kada ken mes saka nan konklushon! 

Mi no por bai den mas detaye, teniendo kuenta ku mi obligashon di sekresia. Loke sí mi ke  enfatisá ta ku den e tempu aya, debidamente nos a duna konseho na e funshonario ku  entretantu ta eks minister, riba e maneho di kobransa general nobo. Esaki a enserá, manera  OECD tambe ta konsehá, pa no bai kobra “aanslagnan” di 5 aña òf mas bieu di forma aktivo a  ménos ku tin un situashon spesial por ehèmpel si ta trata kaso den korte òf kasonan ku ta den  tratamentu na Ministerio Públiko. Te kaminda ami ta na altura e eks minister a pidi konseho  tambe serka CFT, SOAB, SVB, Finansa i Direktorado di Asuntunan Fiskal i tur a duna konseho  positivo. E desishon final di e minister di Finansa, fechá 31 di yanüari 2023 pa no kobra  “aanslagnan” di 2017 i mas bieu, ta kompletamente kontra di e konsehonan risibí anterior i  tambe kontra di loke internashonalmente ta usual. E pregunta ku ta surgi for di esaki ta, a base  di kua maneho e minister a tuma un desishon riba su mes i publik’é riba su “social media” i otro  medionan di komunikashon. Esaki ta un desishon ku tin konsekuensianan hopi grandi. Ken a  tuma e desishon aki i a base di kua outoridat? E konsekuensianan ta konosí, esta un suma di  mas ku 3.1 miar florin ku no por kobra mas, di kua alrededor di 2 mion ta parti integral di e debe  di e “expediteur” ariba menshoná. Mi ta ripití, e echo ku no por kobra e suma spesífiko aki  meskos ku e sobra di e 3.1 miar florin no ta un fayo ku por kulpa Ontvanger di Kòrsou di dje! Pa sobra detayenan lamentablemente mi no por duna mas informashon, teniendo kuenta ku ta  trata di un kaso kaminda tin un investigashon kanando.