KUERPO POLISIAL KÒRSOU 

 

KOMUNIKADO DI PRENSA

415/2025

1 novèmber 2025 

Oumento di ladronisia di vehíkulonan di karga 

E tim di Kuerpo Polisial Kòrsou ku ta enkargá ku ladronisia di vehíkulo, a  konstatá ku tin varios ladronisia di vehíkulonan di karga, manera pikòp, vèn bùs, treiler i ‘Caddy’ últimamente. 

Un petishon ta bai na doñonan di negoshi i personanan individual ku ta  disponé di un òf mas di e vehíkulonan aki, pa ta atento riba nan propiedat. Pone protekshon nesesario riba nan i stashoná nan mas tantu posibel kaminda  ku tin kámara i bou di sufisiente iluminashon. 

Kaminda ku por, hinka e vehíkulo den kurá. 

Nos ta aserkando fin di aña i e posibilidat ta eksistí ku malechornan ta kuminsá  hòrta e vehíkulonan aki, pa asina nan por usa nan pa kibra negoshi i kue  merkansia grandi i di balor haltu bai kuné. 

Polis ta keda atento pa e fenómeno aki i lo pone èkstra atenshon riba  medionan di transporte di karga ku ta move riba kaya, sigur den oranan di  anochi i mardugá. 

Kòrda ku ta huntu so nos por hasi nos isla mas sigur.