Pa haña un mihó bista di desaroyo ekonomiko   CBCS ta lansa di dos edishon di enkuesta di industria na Kòrsou  

 

Pa haña un mihó bista di desaroyo ekonomiko  

CBCS ta lansa di dos edishon di enkuesta di industria na Kòrsou   

WILLEMSTAD/PHILIPSBURG —Centrale Bank van Curaçao en Sint Maarten (CBCS) ta  realisando un ronda nobo di kolekshon di datos for di kompanianan den sektor di industria na  Kòrsou pa asina evaluá e desaroyonan na nivel lokal. Despues di e enkuesta eksitoso ku a tene  pa promé biaha na 2024, e di dos edishon akí ta wak kon aktividat industrial a sigui desaroyá.  Lo konsentrá entre otro riba produkshon, empleo, eksportashon, invershon i e retonan  prinsipal ku e negoshinan ta enfrentá. E ehersisio akí ta forma parti di CBCS su esfuerso  kontinuo pa mehorá su rekolekshon di datos, haña un mihó bista di e manera ku sektor  industrial na Kòrsou ta prestando i komprondé kua ta e retonan ku e ta enfrentá. E opinion di  negoshinan tokante nan prestashon aktual, situashon ekonómiko en general i nan  espektativanan pa futuro serkano ta di gran balor pa análisis i pronóstiko ekonómiko.  

  

Dia 3 di novèmber 2025, CBCS lo manda un e-mail ku un lenk pa un enkuesta online pa  negoshinan den sektor di industria. E kuestionario ta disponibel na papiamentu, hulandes i ingles.  Pa yena e enkuesta lo tuma aproksimadamente 10 minüt. E kontestanan ta keda anónimo i lo trata  tur dato na un manera estriktamente konfidensial. 

Datos i informashon konfiabel tokante e sektornan klave ta esensial pa por produsí análisis  ekonómiko sólido. Na ougùstùs di e aña akí, CBCS a amplia su programa di enkuesta di sektornan i a inkluí sektor di konstrukshon. E informashon rekolektá mediante e enkuestanan akí ta sirbi komo  un fuente balioso pa preparashon di Boletin Ekonómiko ku CBCS ta publiká kada kuartal kaminda  ta hasi un análisis amplio di e prestashon i perspektiva ekonómiko di tantu Kòrsou komo Sint  Maarten. CBCS ta prepará e análisisnan akí pa asina aportá na formulashon di maneho monetario,  fiskal i ekonómiko, i yuda ku evaluashon di efektividat di maneho. Ademas, nan ta kontené  informashon balioso ku un negoshi por tene kuenta kuné ora di hasi planifikashon finansiero i tuma  desishon di invershon. 

CBCS ta pidi kooperashon di tur kompania den sektor di industria na Kòrsou. Por fabor, yena e  enkuesta promé ku dia 17 di novèmber 2025. Si bo ta den sektor di industria i ke partisipá, pero bo  no a risibí un e-mail, pidi e lenk di e enkuesta online na research@centralbank.cw. Ku bo  konosementu i eksperensia, CBCS por haña un mihó bista di e manera ku ekonomia ta desaroyá i  presta na Kòrsou. 

  

Willemstad, 2 di novèmber 2025  

CENTRALE BANK VAN CURAÇAO EN SINT MAARTEN