Frakshon den Parlamento Konsulta nashonal pa oumentá AOV ta nesesario?

Frakshon den Parlamento
Konsulta nashonal pa oumentá AOV ta nesesario?

Konformé promesanan polítiko hasí durante kampaña pa elekshon 2025 i su resultado.
Despues ku PAR a publiká den luna di ougùstùs último dos di su proposishonnan pa oumentá AOV:
1.fasilitá personanan indokumentá na Kòrsou un pèrmit temporal di trabou pa nan tambe kontribuí na e fondo di penshun di AOV, otro primanan sosial i entrada pa Gobièrnu,
2.kambia e sistema di kobransa di impuesto direkto mas tantu posibel pa un sistema di kobransa di impuesto indirekto unda tur persona na Kòrsou ta kontribui den e fondo di penshun di AOV. otro primanan sosial i entrada pa Gobièrnu.
PAR ku hopi satisfkashon i no sorpresivamente a tuma nota den prensa i medionan sosial ku Gobièrnu seriamente a evaluá i indiká ku ta bai implementá tur e dos proposishonnan hasí. Mas aleu PAR a tuma grato nota ku Gobièrnu a evaluá pa introdusí:
3. un Entry Fee pa turistanan, un proposishon mas ku PAR a presentá durante kampaña pa elekshon 2025 pa generá mas tantu entrada posibel pa Gobièrnu bou di e nòmber ‘Tourist Tax’
Tene na kuenta ku PAR seriamente a presentá e proposishonnan ariba menshoná den su agènda di puntonan di akshon 2025 – 2029, pa asina oumentá e montante básiko aktual di AOV te na XCG. 1.500. =
. PAR su intenshon tabata pa implementashon di e kambionan aki inisiá riba termino korto, esta mas tardá pa yanüari 2026 i tuma un periodo di ehekushon kompletu di maksimo 2 aña, kaminda tur aña gradualmente subida lo tuma lugá.
PAR a tuma nota ku Gobièrnu ke hasi e tópiko di ‘oumento di AOV’ , sea den forma di un indeksashon i / òf un oumento di e montante básiko- un diskushon nashonal kaminda ta e intenshon pa inisiá un konsulta nashonal pa diskutí e tópiko promé ku tuma un desishon konkreto, asina desplasando taktikamente e periodo di toma di desishon na bienestar di Pueblo di Kòrsou.
PAR ke rekordá Gobièrnu ku durante kampaña pa elekshon 2025, Gobièrnu den representashon di su partido a hasi e mesun promesa polítiko durante kampaña pa elekshon 2025 (meskos ku tur otro partido ku representashon den Parlamento) i mediante un moshon den Parlamento pa oumentá AOV i manera indiká den su propio Programa di Gobernashon 2025 – 2029.

Basá riba e intenshon di Gobièrnu pa bai un konsulta nashonal pa oumentá AOV, Gobièrnu a konsiderá ku Gobièrnu mester a bai un konsulta nashonal:
pa ku firmamentu di un akuerdo pa salba ENNIA i mara Pueblo di Kòrsou i su futuro
generashonnan na un montante di mas ku 1,7 mil mion durante 30 aña largu i Banko Sentral durante 50 aña largu?
ora di a tuma e desishon pa eksonerá 3,2 mil mion florin di impuesto, ku ta sèn di Pueblo?
ora a fia miones di florin for di Hulanda?
ora a subi salario di trahadónan públiko konforme lei?
Sugerensia di PAR na Gobièrnu ta, sea kual sea e opshon ku Gobièrnu disidi p’e, pa mantené su mes na lei i promesanan polítiko hasí na Pueblo i ehekutá mas pronto posibel e kambio tan prometé pa ku AOV.
Hasi uso sin miedu di e proposishonnan ku PAR a presentá pa entre otro e tópiko aki durante su kampaña pa elekshon 2025, kual mayoria di PAR su otro proposishonnan ta reflehá bèk den e Programa di Gobernashon 2025 – 2029.
PAR a demostrá di ta duna su aporte for di oposishon, pero ta spera manera indiká mas ariba, ku Konsulta Nashonal no ta un táktika pa desplasá i / òf alargá den tempu e toma di desishon i desepshoná e grupo grandi aki di 30 mil penshonado di Pueblo di Kòrsou.
MFK i Minister Silvania a risibí TUR poder i mandato polítiko nesesario di Pueblo (un mayoria apsoluto den Parlamento) pa por kumpli ku su promesanan di kampaña i Pueblo ta spera ku e ta kumpli na forma serio i no ta ‘bira bira’