PAR su proposishonan pa subi AOV

PAR den su agenda di puntonan di akshon 2025 – 2029, tin menshoná oumento di AOV na XCG. 1.500,-.
Den un komunikado di prensa fechá16 di yüli 2025, minister di finansa a duna un splikashon tokante e status di adaptashon, indeksashon i/ò oumento di AOV. Na final di e komunikado minister di finansa ta indiká fuentenan i dokumentonan ku ta substansiá su komunikado. IMF den fin di yüni último a duna un presentashon kual ta ekspresá ku e balor real di kompra di e penshonado a baha ku 23%, representando un forsa di kompra na balor di XCG. 668,=. E entrada di e penshonado di AOV ta representá aproksimadamente un tersio (32.7%) di e salario mímino (XCG. 2.040) den aña 2025. Indikando i supstansiando ku mester bin un reforma di e lei di penshun di AOV. Den e Programa di Gobernashon 2025 – 2029 tambe gobièrnu aktual ta menshoná na diferente okashon ku mester oumentá e montante di AOV.
PAR den su agènda di puntonan di akshon 2025 – 2029 a proponé diferente alternativa pa krea entrada pa oumentá penshun di AOV, entre otro dor di:
1. fasilitá personanan indokumentá na Kòrsou un pèrmit temporal di trabou (mira Aruba) pa nan tambe kontribuí na e fondo di penshun di AOV i otro primanan sosial via pago di impuesto direkto.
Teniendo na kuenta ku dor di kresementu di enbehesimentu (ménos hende ta trahándo) entrada di primanan na e fondo di penshun di AOV ta bahando drastikamente;
2. kambia e sistema di kobransa di impuesto direkto mas tantu posibel pa un sistema di kobransa di impuesto indirekto unda tur persona -inkluso esun indokumentá i turista- ku kumpra na Kòrsou ta kontribuí den e fondo di penshun di AOV
PAR ta konvensí ku pa yanüari 2027 un reforma struktural di e fondo di penshun di AOV, oumento i/ò indeksashon di penshun di AOV ta posibel. Pa no laga tur penshonado ku un penshun di AOV warda te aki 2 aña pa por risibí un oumento i/ò indeksashon di su penshun di AOV, PAR ta proponé lo siguiente:
1. un “Toelage” di XCG. 637,= (pa kompletá e AOV na XCG. 1.500, =) entrante yanüari 2026 pa por mehorá kalidat di bida di tur penshonado, adelantando aprobashon di e lei nobo di penshun di AOV ku mester ta un reforma struktural pa 2027 pa tur penshonado;
2. kubri e “Toelage” aki ku entradanan di impuesto dor di kresementu ekonómiko di país. I supstansiá e realisashon konforme e proposishonan di PAR ariba menshoná. Sea konsiente ku e kresementu di e enbehesimentu ta mas rápido ku e kresementu ekonomiko.