Gabinete Pisas No ke transparensia! Ke tene e “black box” ront di servisio di impuesto será.

 

Gabinete Pisas No ke transparensia!

Ke tene e “black box” ront di servisio di impuesto será.

 

Ku asombro suskrito a tuma nota di reakshon di Minister Cooper riba petishon di Parlamento pa skucha Ontvanger den kuadro di e informashonnan sensibel ku a sirkulá den medionan di komunikashon.

Último simannan un esfera sumamente konfuso a keda kreá rondó di servisio di impuesto di Kòrsou, basá riba informashonnan ku a sali di e rapòrtnan di SOAB, deklarashon di Minister, di ambtenarnan di servisio di Impuesto, di Consultant, komunikado di Ministerio Públiko i deklarashon di Ontvanger riba e tema.

Huntu ku informashonnan den rapòrtnan di SOAB ku ta krea e impreshon ku ta benefisiá sierto pagadó di belasting riba otro, a sali den publisidat informashonnan sekreto di pagadónan di Belasting ku ta un violashon grave di privasidat di tur miembro di e komunidat aki.

E tema ta asina serio ku suskrito ta un di e personanan ku a entregá petishon pa e reunion públiko, pa asina por yega na klaridat riba e temanan aki. Konsientemente indieners a pidi presensia di Ontvanger tambe, pa por hasi preguntanan konkreto pa determiná kiko ta e realidat, ken ta responsabel pa kiko i ki pasonan por tuma pa evita e tipo di susesonan aki den futuro.

E echo ku Minister Pisas a deklará publikamente, ku Gobièrnu a duna Ontvanger eksonerashon p’e papia libremente ku Parlamento i komunidat, tabata mustra un garantia pa transparensia real na Parlamento i na komunidat.

Pues ta ku hopi asombro suskrito a tuma nota ku awe Minister Cooper ta deklará den Parlamento ku e no tabatei den konseho di Minister dia a duna Ontvanger dispensashon, ku e si ta kontra i e lo NO invita niun ambtenaar pa bin duna informashon na Parlamento.

Pues Minister Cooper ta rekonosé ku Gabinete Pisas (konseho di Minister) a duna eksonerashon pa sr. Trona pa papia ku Parlamento, pero é si lo no fasilitá esaki.

Gabinete Pisas realmente ke transparensia pa komunidat si òf nò? Kon por ta posibel ku Konseho di Minister ta tuma un desishon na nòmber di tur Minister i un minister riba su mes ta aktua kontra di e desishon aki i bisa ku e ta kontra? Den Gabinete Pisas no ta eksistí unidat di maneho segun art. 4 di Reglamentu di Orden di Konseho di Minister? Un Minister riba su mes por bai kontra maneho di Konseho di Minister?

E eksonerashon ta spesifiká na ki tipo di reunion di Parlamento Ontvanger por papia? No tabata hustamente den kuadro di un reunion Públiko di Parlamento miembronan di Parlamento a pidi presensia i eksonerashon di Ontvanger i Konseho di Minister a dune eksonerashon?

Tur kos ta mustra ku esaki ta un otro strategia mas pa sera boka di Ontvanger i sera boka di Parlamento. Di e forma aki, nunka Io permití informashon real yega na komunidat i nunka lo bini klaridat real den henter e “black box” rondó di Servisio di Impuesto.

Promé a usa Presidente di Parlamento pa di forma ilegal para un reunion pidí dor di tres miembro i awor ta usa un Minister Cooper pa nenga presensia di Ontvanger na Parlamento.

Ta bisto ku Gabinete Pisas NO ke transparensia den e “black Box” di servisio di impuesto.

Quin\y Girigorie

Lider di frakshon di PAR