Jeanette Semeleer ta urgi pa akshon konhunto i ku kurashi pa mas resiliensia den Karibe 

Durante charla ‘Adlith Brown Memorial’: 

Jeanette Semeleer ta urgi pa akshon konhunto i ku kurashi pa mas resiliensia den Karibe   

WILLEMSTAD/PHILIPSBURG — Djaweps dia 13 di novèmber, Centrale Bank van Curaçao en  Sint Maarten (CBCS) a organisá e charla Adlith Brown Memorial, un di e momentonan  kulminante di e konferensia Annual Monetary Studies (AMSC) di e aña akí. Komo keynote  speaker, Jeanette Semeleer, Presidente di Centrale Bank van Aruba, a presentá su charla titulá  ‘Aruba, From Isla Inutil to Isla Inovativo’. Sra. Semeleer a usa e shòknan eksterno ku Aruba a  eksperensiá pa mustra ku berdadero resiliensia ekonómiko ta enserá mas ku rekuperá. Mas  bien, e ta nifiká inová.  

  

For di 1985, e charla anual konosí komo Adlith Brown Memorial Lecture ta rindi homenage na Dr.  Adlith Brown, kende a fungi komo Koordinadó di e programa regional di estudio riba tereno  monetario di 1980 pa 1984. E charlanan ta un rekonosementu pa e dama akí su vishon regional,  liderazgo intelektual i perspikasia riba tereno di maneho. 

Sra. Semeleer a toka e tema di e konferensia AMSC, esta, ‘Resiliensia via transformashon,’ i a splika kon Aruba ta trahando no solamente riba rekuperashon (‘bouncing back’) sino tambe riba  inovashon (‘bouncing forward’). El a mustra riba e importansia di diversifikashon mas ayá di  turismo, invershon den kapital humano, kapasidat institushonal i independensia, maneho  medioambiental i adopshon di turismo responsabel, energia bèrdè, ekonomia blou i  transformashon digital. Tambe, el a enfatisá e balor di aktua ku balentia i prudensia den maneho di  krísis, komuniká na un manera kla i plania pa kontingensia, ya ku tur esaki ta kontribuí na konfiansa  i stabilidat. Sra. Semeleer a señalá ku e desafionan riba plano internashonal, spesialmente esunnan  riba tereno geopolítiko i di kambio klimátiko, ta eksigí adaptashon urgente, i ku kolaborashon entre  e institutonan di gobièrnu i ku komunidat ta esensial pa fomentá inovashon, oumentá resiliensia i  logra kresementu inklusivo riba plaso largu. 

Despues di un seshon di turno liber, Richard Doornbosch, Presidente di CBCS, a ekspresá un  profundo apresio pa Sra. Semeleer su kolegialidat i sentido di kompromiso, su hopi añanan di  servisio ku dedikashon, i su vishon balansá i ku bista pa futuro. 

Un vidio di e charla Adlith Brown Memorial di 2025 ta disponibel riba e kanal di YouTube i e plataformanan di ret sosial di CBCS. 

Willemstad, 14 di novèmber 2025 

CENTRALE BANK VAN CURAÇAO EN SINT MAARTEN