Dia 9 di yanuari 2026 a kuminsa ku renobashon di un ala, e prome ala, di e edifisio Habaai.

Dia 9 di yanuari 2026 a kuminsa ku renobashon di un ala, e prome ala, di e edifisio Habaai. Pa Fundashon Birgen di Rosario esaki ta asina importante, ku nos no por a laga esei bai sin para ketu na e momento spesial aki.

Habaai manera e ta konosi den boka di pueblo a wòrdu konstrui pa gran parti entre añanan 1864 te ku 1867. Pues 159 aña pasa! Despues, den transkurso di añanan a keda konstruí mas parti aserka. E parti kaminda nos ta bai kuminsa renobá ta pertenesé na e prome parti ku a wòrdu konstruí den añanan 1864 te ku 1867.

E edifisio promé, for di aña 1867, a sirbi komo ku un internat pa mucha muhe riku di Kòrsou i di region, entre otro di Aruba i Saba, pero tambe Venezuela, Colombia, Trinidad, ets. Nan tabata bin biba pa aki wòrdu eduká. Un ke otro tabata masha dèftu! Ta Spaño nan tabata papia en tempu ey ku e muchanan!

Di aña 1867 te ku luna mei di aña 1940, Habaai a sirbi pues komo internat. Ora promé guera mundial a kuminsa , e mucha muhe nan ku tabata biba den Habaai a bai nan kas bèk. Dos aña despues, Habaai a bira un kazerna ora militarnan a bin biba den Habaai. Esaki a tuma lugá for 1 di mei 1942 i a dura mas òf menos 1 aña. E militarnan a pone un plakaat di nan estadia den Habaai.

Den luna di desèmber 1943 a kuminsa ku kuido di hende muhe grandi den Habaai. I esei a keda asina te ku dia di awe. Te poko siman pasa, Habaai por a akapará 150 hende grandi, tantu hende homber komo hende muhe. Otro siman nos fundashon ta selebrá su 83 aña di eksistensia.

Fin di 2019 a kuminsa e proseso pa regla ku Habaai ta bin na remarke pa wòrdu denominá komo monumento protehá. Pa esaki nos a haña asistensia di sr. Michael Newton i sra. Gerda Gehlen. E parti aki a tuma su tempu. Pero den maart 2022 nos a hana konfirmashon ku Habaai por wordu remarká komo momumento protehá. Esaki a hasi pa nos posibel pa por kuminsa yega na renobashon di e edifisio ku tantu historia aki.

Nos lo start ku un ala, kaminda e renobashon lo tuma luga na 3 piso, piso plano, promé piso i e “zolder”. Tambe tin un pida kelder ku lo wòrdu renoba. Huntu esaki ta forma 35% di e superfisio di e edifisio. Den e parti di renobashon aki, nos ta hasi nos maksimo esfuerso pa hasi e akomodashon mas adekuá posibel pa nos grandinan. I den esaki pa nos personal tambe ku tin di laborá diariamente den e edifisio aki. Nos ke logra ku Habaai tiki tiki pero sigur ta bolbe bira e edifisio nechi i dèftu ku e tabata den pasado.

Un edifisio ku defakto tin kasi 160 aña mester di un renobashon profundo. I nos ta gradisi Stichting Monumentenfinds ku a mira e nesesidat di e proyekto sosial aki. Nos tin mas ku 2 aña ta negoshá ku nan pa nos logra e finansiamentu di e proyekto magno i nesesario aki. Nos ta den bon kombersashon i komunikashon pa ku esaki.

Pero nos no por a warda pa kuminsa. Nos kier a realisá un proyekto bunita i nesesario pa e personanan di terser edat, den un merkado ku yen di konstrukshon. T’apesei nos ta hopi kontentu ku Frens Construction komo kontartista mayó ku vasto eksperensia den renobashon di monumento tabata tin e interes i e pasenshi ku nos. Esaki ta konta tambe pa tur e otro kontratistanan ku ta bai kontribuí ku e proyekto di renobashon aki.

Un palabra di elogio i gratitut ta bai pa TaskVision, den persoon di Sharlon Isenia, ku a kana sam sam ku Birgen pa logra e preparashonnan pa ku e renobashon. Tambe ta yama danki di kurason na e Manager i e tim fasilitario pa tur e mudansanan ku mester a tuma luga. Tur kos mester a ruim op! Na e personal di kuido i e guianan di aktividat, danki pa boso aporte i pasenshi. Na e kliente, famia di kliente, persona di kontakto i miembronan di personal, danki pa e koperashon pa e mudansanan nesesario ku por a trese inkonbenensia. Last but not least: danki na Hunta di Supervishon di Birgen, pa konfia i kere den e proyekto aki.

Na final di e proyekto, ku lo dura mas of menos 13 luna, nos lo hasi un fiesta grandi pa e logro aki.

Riba e portrètnan athunto por mira e momentu ku sr. Sharlon Isenia di Taskvision ta splika e proseso di renovashon ku lo bai tuma lugá, i tambe e momentu ku a hasi e akto pa inougurá e renobashon.