Dia 1 di februari 1996, pa contraaresta e cantidad alarmante di contrabanda di droga y traficacion di hende pa e islanan bisiña for di Venezuela y Colombia den añanan 80 y 90, Hulanda, Antias y Aruba a funda Kustwacht Nederlandse Antillen en Aruba (KWNA&A) y na momento cu a disolve Antias na 2010, esaki a bira Kustwacht Caribisch Nederland (KWCARIB).

Na comienso, e organisacion tabata consisti di un grupo relativamente chikito di profesional cu tabata traha riba lama cu hopi dedicacion. Antes tabata sali riba lama cu e intencion di intercepta botonan cu ta meti den ilegalidad. Awendia Kustwacht ta consisti di un gran cantidad di profesional dedica y motiva y ta conta cu botonan di velocidad halto manera e boto di patruya Panther, Metal Sharks, Super RHIBS, Boston Whalers, Helicopter AW139 y Avion DASH8 cu ta ekipa cu tecnologia moderno y hunto cu sistemanan di radar avansa riba lama y riba tera, por intercepta cualkier movecion sospechoso den awanan teritorial di Caribe Hulandes. Nan encarga cu ehecucion di ley maritimo, deteccion di criminalidad (droga, arma, pesca y inmigracion ilegal), proteccion di medio ambiente, y operacionnan di Buskeda y Rescate (SAR) na Aruba.

E trabou awendia ta basa riba sistemanan di inteligencia cu ta haci e trabao riba lama mucho mas eficiente.

Ademas di celebra 30 aña di Kustwacht, a reconoce e trabou di tres agente di Kustwacht pa nan 25 aña di servicio, dedicacion y integridad. Ta trata di Rivelino Kelly, Nehomar Rasmijn y Rowaltski Paskel. Tambe a reconoce Sra. Juanita Ozuna cu ta un trahando 25 aña na Kustwacht como personal civil.

Minister di Husticia mr. drs. Arthur Dowers a asisti na Kustwacht Aruba na Marinierskazerne Savaneta pa celebraeaniversario hunto cu e personal.

Minister Dowers ta felicita e personal di Kustwacht pa nan añanan di trabou incansabel den cuida nos teritorio maritimo di transporte ilicito di hende, droga y arma.