Parlamento di Kòrsou a deliberá ku Minister Presidente, Minister di Desaroyo Sosial, Labor i Bienestar i Minister di Finansa enkuanto indeksashon di AOV konforme e lei i su finansiamentu.

Djaweps, 5 di mart 2026, Parlamento di Kòrsou a reuní den un Reunion Públiko pa trata dos punto di agènda.

Despues di trata e promé punto, “Dokumentonan ku a drenta”, Presidente di Parlamento, sr. Fergino Brownbill, a pasa na e di dos punto di agènda: deliberashon ku Minister Presidente, sr. Gilmar Pisas, Minister di Desaroyo Sosial, Labor i Bienestar, sra. Charetti America-Francisca, i Minister di Finansa, sr. Charles Cooper, tokante indeksashon di AOV konformé e lei i su finansiamentu.

Presidente di Parlamento a indiká ku lo tin dos tanda di pregunta e promé tanda di 20 minüt i e di dos tanda di 10 minüt.

Seguidamente, Presidente di Parlamento a habrí e promé tanda pa Miembronan di Parlamento por hiba nan disertashon i hasi preguntanan na e Ministernan presente.

Na final di e promé tanda, Ministernan a pidi algun siman pa por prepará e kontestanan riba e preguntanan ku a keda hasí dor di Miembronan di Parlamento.

Presidente di Parlamento, sr. Fergino Brownbill, a skòrs e reunion te ku próksimo aviso.