Parlamento di Kòrsou Djárason, 11 di mart 2026, di dos dia di Intertraffic 2026 na Amsterdam, Hulanda.
Parlamento di Kòrsou
Djárason, 11 di mart 2026, di dos dia di Intertraffic 2026 na Amsterdam, Hulanda.
Riba e dia aki e delegashon di Parlamento presente a pone enfoke riba infrastruktura di kaminda i alabes seguridat riba kaminda. Pa e temanan aki a bishitá diferente “booth” ku ta atendé ku bòrchinan i lusnan di kaya i tambe material pa usa riba kaminda.
Por a tuma nota di variashon grandi di bòrchinan di kaya ku ta usa materialnan di kalidat mas haltu ku esnan usual i ku por ehèmpel tambe ta duna mas iluminashon. Tambe lusnan di tráfiko moderno ku ta inkorporá mas opshon di señal i direkshon pa tantu e peaton komo e tráfiko motorisá.
Un otro interes speshal di e delegashon tabata e desaroyo di e sistema i material pa pinta kaya. Akinan a risibí un splikashon amplio riba un material spesífiko ku ta usa por ehèmpel na Hulanda ku por bira hopi friu i na un siudat manera Dubai ku ta hopi kayente. E material en kuestion ta keda konsiderá komo “high performance”. E tin diferente bentaha manera resistensia na tur tipo di wer, ta reflehá ku lus i ta diki di manera ku un shofùr ta sinti ora e pasa riba dje.
Por último a pasa i tuma informashon na un kompania ku ta traha produktonan sostenibel i di kalidat haltu pa drecha i hasi mantenshon di kaya. Akinan por menshoná por ehèmpel un seyo elástiko di dos komponente ku por usa pa yena asfalt ku sker na un manera simpel, rápido i efektivo.
