Minister Boekhoudt ta fortalesé koperashon entre Kòrsou i Colombia den kuido di salú, seguridat alimentario i salú públiko
Salubridat Públiko, Medio Ambiente i Naturalesa
Minister Boekhoudt ta fortalesé koperashon entre Kòrsou i Colombia den kuido di salú, seguridat alimentario i salú públiko
Publiká riba 08 Mei 2026
Willemstad – Durante e aktividatnan ofisial den kuadro di Velas del Caribe na Kòrsou, presensia di e barku di entrenamentu naval di Colombia, ARC Gloria, a krea un plataforma importante pa sigui fortalesé e relashon entre Kòrsou i Colombia.
Komo parti di bishita di Minister di Asuntunan Eksterior di Colombia, Su Ekselensia Rosa Yolanda Villavicencio Mapy, na Kòrsou, varios paso konkreto a wordu koordiná pa Curaçao Investment & Export Promotion Agency (CINEX) i ProColombia, ku apoyo di Ministerio di Asuntunan Eksterior di Colombia, pa sigui promové koperashon entre Kòrsou i Colombia den kuido di salú, seguridat alimentario, koperashon veterinario i salú públiko.
Durante e kombersashonnan aki, Minister di Salú, Medio Ambiente i Naturalesa di Kòrsou, Minister Tyron Boekhoudt, a pone enfasis riba nesesidat kresiente di Kòrsou pa spesialistanan médiko i a kompartí su plannan pa bishitá Colombia pa eksplorá oportunidatnan di koperashon den sektor di salú.
Minister Boekhoudt lo bishitá Colombia riba 2 di yüni, kaminda e lo sostene reunionnan ku diferente outoridatnan i institushonnan relevante di Colombia pa sigui fortalesé koperashon den kuido di salú, salú públiko, seguridat alimentario i interkambio tékniko.
Otro areanan di koperashon ta inkluí evaluashon di oportunidatnan relashoná ku rekesitunan pa bishitanan Colombiano ku ta biaha ku bestianan doméstiko pa Kòrsou, sigurando ku tur norma veterinario i salú públiko ta wordu kumplí. Tambe lo eksplorá e posibilidat pa prepara un “Letter of Intent” entre Kòrsou i Colombia pa formalisá koperashon den seguridat alimentario, inspekshon sanitario, koordinashon veterinario, koperashon den kuido di salú i intercambio tékniko.
Bou di liderato di Minister Boekhoudt i ku e apoyo koordiná di CINEX, ProColombia i e outoridatnan Colombiano, e momentum aki a desaroyá den un oportunidat konkreto pa fortalesé koperashon den areanan ku tin impakto direktamente riba bida diario di siudadanonan i ku ta kontribuí na resilensia i desaroyo di Kòrsou a largo plaso.
