Prome Minister Mike Eman a reuni cu Sharon Dijksma, burgemeester di Utrecht. Aruba ta mira varios posibilidad pa traha hunto cu diferente gemeente di Hulanda.

Durante e combersacionnan, Prome Minister Eman a amplia riba e desaroyonan cu Aruba ta haci actualmente relaciona cu reutilisacion di area industrial di ex-refineria na San Nicolas unda ta busca pa solucion sostenibel pa proceso di sushi y reciclahe. A discuti tambe e posibilidadnan pa cooperacion entre e diferente islanan den region Caribe pa enfrenta reto comun den un forma mas eficiente y sostenibel.

Un tema importante durante e encuentro tabata innovacion den reciclahe y e importancia creciente di economia circular. Burgemeester Dijksma a señala e experiencia amplio cu tin den Hulanda, incluyendo e trabounan di NV Huisvuilcentrale (HVC), un compania Hulandes specialisa den reciclahe, proseso di desperdicio y energia sostenibel. Prome Minister Eman a expresa gran interes den e conocemento y tecnologia cu por contribui na futuro sostenibel di Aruba y di region Caribe.