Delegashon di Parlamento di Kòrsou ta boga pa igualdat den koperashon entre e Paisnan den Reino, durante promé dianan di IPKO.

Delegashon di Parlamento di Kòrsou ta boga pa igualdat den koperashon entre e Paisnan den Reino, durante promé dianan di IPKO.

DEN HAAG, Djadumingu 7 di yüni 2026. Un delegashon di Parlamento di Kòrsou ta na Hulanda kaminda nan ta partisipando na e enkuentronan di Konsulta Interparlamentario di Reino (IPKO). E promé dos dianan di trabou den Tweede Kamer a resultá masha intensivo pero alabes hopi produktivo. Durante e debatenan, lokual a kana manera un liña kòrá, ta e konsientisashon serka tur e delegashonnan, ku un mihó koperashon entre e Paisnan den Reino, por eksistí únikamente a base di igualdat absoluto entre e Paisnan.

Djabièrnè 5 di yüni 2026: Apertura ofisial i bishita di trabou na Haarlem
E IPKO a habri ofisialmente riba djabièrnè 5 di yüni ku un diskurso di entre otro Presidente di Parlamento di Kòrsou, sr. Fergino Brownbill. Siguí pa esaki, presidente di komishon sr. David Seferina a duna un presentashon tokante e desaroyonan resien na Kòrsou.
Despues di mèrdia, e delegashonnan a realisá un bishita di trabou na Haarlem bou di e tema ‘E Bario komo Ekosistema’. Durante e bishita aki, e delegashonnan a haña mihó komprondementu di inisiativanan inovador relashoná ku kuido pa grandinan, enbehesementu di poblashon i kuido den komunidat. Delegashon di Parlamento di Kòrsou a konsiderá e bishita aki balioso i inspirador, konsiderando ku e eksperensianan por sirbi komo inspirashon.

Djasabra 6 di yüni 2026: Deliberashon struktural i panel interaktivo
E enfokedi e dia aki tabata dirigí riba e tema fundamental: ‘Koperashon den IPKO i den Reino’. Bou di guia di profesor Wouter Veenendaal, a hiba kòmbersashonnan skèrpi i profundo tokante kiko ta funshoná i kiko no ta funshoná den e relashonnan den Reino.
Despues di e diskushon plenario, a sigui diskushonnan interaktivo den kuater diferente grupo di trabou: Finansa i Maneho; Seguridat i Estado di Derecho;
Maneho Eksterior i Defensa i Enseñansa i Desaroyo.

IPKO lo finalisá djaluna 8 di yüni próksimo. Riba agènda di e último dia aki lo trata e tema ‘Adaptashon di Klima’, ku un presentashon di ‘Nationaal Burgerberaad Klimaat’, siguí ku firmamentu ofisial di e lista di akuerdo, kombiná ku un konferensia di prensa ofisial.
Por partisipá na e konferensia di prensa via e link aki: https://teams.microsoft.com/meet/319550504416685?p=SXrJl1R1IXiSGxyUom
Vergadering-id: 319 550 504 416 685
Wachtwoordcode: fG7Te6ti.

E delegashon di Kòrsou ta konsistí di e siguiente miembronan:
• sr. Fergino Brownbill (Presidente di Parlamento i lider di delegashon)
• sr. David Seferina, presidente di e komishon di Asuntunan di Reino, relashonnan interparlamentario i relashonnan eksterior i miembro di Parlamento pa frakshon di MFK;
• sr. Ramon Yung, miembro di Parlamento pa frakshon di MFK;
• sr. Frenciss Lourens, miembro di Parlamento pa frakshon di MFK;
• sra. Maria Nita, miembro di Parlamento pa frakshon di MFK;
• sra. Ruthmilda Larmonie-Cecilia, miembro di Parlamento pa frakshon di PNP;
• sr. Quincy Girigorie, miembro di Parlamento pa frakshon di PAR;
• sra. Giselle Mc William, miembro di Parlamento pa frakshon di MAN-PIN;
• kompañá pa grefir di Parlamento, sr. Silvin Cijntje