Harris County, Texas ta deklará 14 di yüni 2026 komo ‘Kòrsou Historic World Cup Debut Day’

HOUSTON, TEXAS – Riba djadumingu, 14 di yüni 2026, ‘Harris County Judge’, sra. Lina Hidalgo, e funshonario elektoral di mas haltu di Harris County, Texas, a entregá un proklamashon ofisial na Promé Minister di Kòrsou, sr. Gilmar Pisas, kaminda ta deklará 14 di yüni 2026 komo ‘Kòrsou Historic World Cup Debut Day’.

E seremonia a tuma lugá na Hotel ZaZa Museum District na Houston, riba mes un dia ku Kòrsou a hunga su promé partido den Kopa Mundial FIFA 2026.

E proklamashon ta rekonosé Kòrsou komo e pais di mas chikí den historia ku a logra kualifiká pa Kopa Mundial FIFA. Ku un poblashon di 156 mil habitante i un superfisie di 443 km², Kòrsou a sigurá su lugá den historia deportivo i mundial. Riba e mésun fecha aki tambe GUINNESS WORLD RECORDS® a entregá e sertifikado ofisial na Kòrsou komo e pais mas chikí (poblashon) pa kualifiká pa FIFA World Cup riba 19 di novèmber 2025. Sr. Gilbert Martina, Presidente di Federashon di Futbòl Kòrsou a risibí e sertifikado ofisial na nòmber di pais.

Durante e seremonia ofisial, Promé Minister Gilmar Pisas a deklará ku: “Curaçao is not just on the football map. We are on the world map. This is what happens when a small island refuses to accept limits.” Na papiamentu: “Kòrsou no ta solamente riba mapa di futbòl. Nos ta riba mapa mundial. Esaki ta pasa ora un isla chikí nenga di aseptá limitashon.

Sra. Lina Hidalgo, Harris County Judge, na su turno a indiká ku: “Greatness is not measured by size. Curaçao is proof of that, and Harris County is proud to stand with them on this historic day.” Na papiamentu: “Grandesa no ta ser midí pa su tamaño. Kòrsou ta prueba di esaki i Harris County ta orguyoso di por kompañá nan riba e dia históriko aki”.

Gobièrnu di Kòrsou huntu ku CINEX a organisá e seremonia ku a konta ku presensia di diferente outoridatnan i invitadónan distinguí. Entre esnan presente, Su Ekselensia Gobernador, sr. Mauritsz de Kort, Presidente di Parlamento, sr. Fergino Brownbill, diferente miembro di Konseho di Minister, i otro ‘stakeholder’nan importante for di Kòrsou i Merka.

For di Karibe te Texas, Kòrsou ta sigui skirbi su historia pa medio di rèkertnan ofisial na ambos banda di Oséano Atlántiko.

Imágennan kortesia di Harris County Judge, Texas.