ADRA i SIFMA ta uni forsa pa empoderá mamanan ku ta risibí supsidio

ADRA i SIFMA ta uni forsa pa empoderá mamanan ku ta risibí supsidio

WILLEMSTAD – ADRA Kòrsou i SIFMA a formalisá un kolaborashon pa brinda mamanan ku ta risibí supsidio via di SIFMA e oportunidat pa desaroyá nan potensial i fortalesé nan posishon den komunidat pa medio di e proyekto Forma Kòrsou.

Komo parti di e kolaborashon, resientemente a organisá un anochi di informashon kaminda mamanan interesá a haña mas detaye tokante e programa, su meta i e diferente tópikonan ku lo keda tratá durante e trayekto di formashon.

Forma Kòrsou ta un proyekto di ADRA Kòrsou i ta enfoká riba empoderamentu di mamanan, invertiendo den desaroyo personal i sosio-ekonómiko di mamanan. Dor di tayernan, “coaching” i sosten kontinuo, e programa ta yuda partisipantenan oumentá nan konfiansa propio, fortalesé nan abilidatnan i traha na un mihó kalidat di bida pa nan i nan famia. Di e forma aki mamanan por ta mihó prepará pa enfrentá desafionan di bida i fortalesé nan famia.

E programa lo kuminsá na luna di ougùstùs 2026 i ta inkluí entrenamentu i “coaching” den diferente area importante, manera: maneho di finansa, salú físiko i mental, desaroyo di abilidat, desaroyo i konosementu personal, relashon familiar i edukashon di yu.

Segun ADRA i SIFMA, invershon den mamanan ta nifiká un invershon den famianan i den futuro di Kòrsou. Dor di brinda mamanan konosementu, guia i sosten práktiko, e organisashonnan ta spera di fortalesé nan kapasidat pa traha na un futuro mas stabil pa nan mes i pa nan famia.

Mamanan ku ta risibí supsidio via di SIFMA i ku ke forma parti di Forma Kòrsou, ta keda enkurashá pa tuma kontakto ku SIFMA na 670-2930 pa inskribí. E kantidat di lugánan ta limitá.