Atvertensia na komunidat pa no kai den trampa di hendenan ku ta kana kobra na nòmber di GMN pa supuesto trabounan di kontròl di plaga

Atvertensia na komunidat pa no kai den trampa di hendenan ku ta kana kobra na nòmber di GMN pa supuesto trabounan di kontròl di plaga

 

Willemstad – Ministerio di Salubridat, Medio Ambiente i Naturalesa (GMN) a risibí diferente keho ku ta indiká ku algun persona ta presentá na negoshinan, spesialmente de e área di Banda Bou,  hasiendo uzo di identifikashon falsu òf te presentá nan mes komo empleado di GMN i ta kobra pa servisio di kontròl di plaga òf flitmentu kontra di insekto.

GMN ta informá komunidat ku Ministerio di GMN no ta parti di esaki i tampoko outorisá òf tin akuerdo di labor ku ningun persona, instansia òf empleado pa bishitá negoshinan ku e propósito aki.

Den kaso ku un empleado di GMN mester bishitá un negoshi den kuadro di su trabou ofisial, e persona lo tin e siguiente identifikashon:

• Unifòrm ofisial di GMN;
• Ta karga un “badge” di identifikashon ku por wòrdu mustrá riba petishon;
• No tin ningun forma di pago pa servisio prestá.

Si tin gastunan mará mes na un servisio komo maneho i/òf lei di gobièrnu esaki lo mester tuma lugá na un di su servisionan.

GMN ta pidi propietarionan di negoshi i komunidat pa ta alerta. No laga pone bo bou di preshon pa paga pa un servisio ku defakto ta obligashon di GMN. Si bo tin duda tokante un bishita òf un persona ku ta bisa ku e ta representá Ministerio, por tuma kontakto ku GMN na number ta 5270854 of  5236338,  promé ku bo hasi kualke pago.

Ministerio di GMN ta tuma e asuntu aki hopi serio i lo hasi e pasonan nesesario pa protehá komunidat kontra di e tipo di engañonan aki.

GMN ta hasi un apelashon na tur persona ku a pasa un eksperensia similar pa entrega un keho na Polis i na Ministerio di GMN.

Ministerio di Salubridat, Medio Ambiente i Naturalesa