Maneho di e edifisio multifunshonal na Playa Lagun   

Maneho di e edifisio multifunshonal na Playa Lagun   

Willemstad – Komo un kantidat di playa públiko na Banda Abou akutualmente ta hopi bishitá (manera entre otro Playa Piskadó, Playa Kenepa Grandi i Chikí i Daaibooi) tin e nesesidat pa halsa kapasidat di fasilidatnan di e playanan públiko.

Den e kuadro aki Minister Gilmar Pisas, enkargá ku Sektor di Agrikultutra, Medio Ambiente i Naturalesa di Ministerio di Salubridat, Medio Ambiente i Naturalesa (GMN) a tuma e inisiativa pa laga traha un edifisio multifunshonal na Playa Lagun. 

E edifisio aki tin unidatnan pa piskadónan warda nan ekipo, bañonan moderno i un terasa riba dak pa organisá aktividatnan. E muraya di e dak di e terasa mester wòrdu reforsá ahinda pa e edifisio ta kompletamente kla.

Naturalmente, mester manehá e edifisio adekuadamente entre otro dor di tene e tualètnan i e terasa riba dak limpi na tur momentu i pa hasi reparashonnan chikítu. 

Un organisashon di Lagun a mustra interés pa manehá e edifisio multifunshonal nobo na Playa Lagun i pa hopi tempu Gobièrnu a hiba negosashonnan ku e organisashon aki, kual lo forma e base pa un akuerdo ofisial.

Aktualmente Gobièrno ta finalisando e akuerdo aki pa asina e mènèdger por kuminsá ku e trabounan. E plan ta pa e maneho di e edifisio enserá ménos impakto finansiero posibel pa Gobièrnu. Pa logra un maneho sostenibel i duradero, usuarionan lo mester paga un tarifa di usuario pa hasi uso di tualèt, ducha i pa uso di terasa di dak.

E entradanan aki ta krea un kontribushon pa e gastunan di maneho di e edifisio, loke ta permití pa kubri un gran parti di e gastunan envolvi ku un peso mínimo riba e presupuesto di Gobièrnu.

E initiativa aki ta forma parti di maneho di Gobièrnu pa mehorá fasilidatnan pa bishitantenan di nos playanan públiko.