Delegashon di Grupo Keralty (Colombia) ta bishitá Kòrsou: siguiente paso konkreto den e plan di Minister Boekhoudt pa redusí e listanan di espera
Salubridat Públiko, Medio Ambiente i Naturalesa
Delegashon di Grupo Keralty (Colombia) ta bishitá Kòrsou: siguiente paso konkreto den e plan di Minister Boekhoudt pa redusí e listanan di espera
Publiká riba 21 Yüli 2026
Willemstad, Kòrsou – 21 di yüli 2026 – Representantenan di Grupo Keralty, e organisashon di salú integrá di kua Clínica Colsanitas ta forma parti, a yega Kòrsou pa un bishita di trabou. E bishita akí ta e siguiente paso konkreto den e plan di Minister di Salubridat Públiko, Medio Ambiente i Naturalesa (GMN), Tyron Boekhoudt, pa redusí e preshon riba nos sistema di kuido i e listanan di espera den kuido spesialisá.
Minister Boekhoudt, huntu ku representantenan di SVB, a risibí e delegashon i a duna nan un bishita guiá den hòspital, kaminda nan a haña un bista amplio di e fasilidatnan, e departamentonan spesialisá i e kapasidat aktual di nos sistema di kuido.
E bishita akí ta sigui direktamente riba e mishon di trabou eksitoso ku Minister Boekhoudt a realisá na Colombia na yüni último, den kua el a bishitá Clínica Colsanitas na Bogotá. Loke e Minister a primintí e tempu ei, awe ta bira realidat: di palabra a pasa na akshon. Den un periodo kòrtiku, e Minister a logra trese e partnernan internashonal na Kòrsou pa traha huntu riba solushonnan konkreto pa nos pashèntnan.
Durante e enkuentronan di awe, a profundisá riba e posibilidatnan di kolaborashon entre Kòrsou i Colombia, entre otro interkambio di konosementu, sosten di spesialistanan médiko i inisiativanan ku por kontribuí na un akseso mas rápido i mihó na kuido spesialisá. Meta prinsipal ta pa e pashènt di Kòrsou no tin nodi di warda lunanan largu mas riba kuido ku e meresé.
Minister Boekhoudt a deklará: “Mi a primintí nos pueblo ku lo mi ataká e listanan di espera ku akshon konkreto, no ku palabra so. E presensia di Grupo Keralty na Kòrsou awe ta e prueba di esei. Nos ta traha stap pa stap, pero ku determinashon, pa garantisá ku kada pashènt ta haña e kuido ku e tin derechi riba dje: mas lihé, mas aksesibel i di mihó kalidat.”
Den e siguiente fase, Ministerio di GMN i SVB, huntu ku Grupo Keralty, lo elaborá e akuerdonan konkreto pa konkretisá e kolaborashon. Gobièrnu di Kòrsou ta keda komprometé pa sigui invertí den un sistema di kuido aksesibel, pagabel i di kalidat haltu pa nos pueblo.