Cas di Cuido di Adulto Mayor NO ta Prepara pa Calamidad

Cas di Cuido di Adulto Mayor NO ta Prepara pa Calamidad

 

Pa: drs. Melva Croes-Yánez; Presidente di Fundacion Alzheimer Aruba y Proyecto  “Bisa NO na Abuso di Adulto Mayor”. 

ORANJESTAD — Un incidente/calamidad recien den un cas di cuido situa na Tanki Leendert  poniendo bida di un adulto mayor na peliger serio, a lanta un ola di preocupacion den comunidad  na Aruba, hasta descualificacion di e maneho di e cas di cuido. E calamidad aki, cu a pone e  siguridad di e habitantenan directamente na peligro, a trece un lus dilanti di un problema  structural, esta e combinacion riesgoso di adultonan mayor vulnerabel hunto cu un hende cu ta  sufri di adiccion severo, cu posibel a causa un atake di agresion diripiente. 

E suceso menciona ta un muestra di falta di capacidad y di hermentnan structural di e gerencia di e  cas di cuido aki, pa por maneha siguridad di su pashentnan den forma responsabel. Famia di e  habitantenan y comunidad en general ta exigiendo contesta inmediato riba con por a permiti un  situacion di e magnitud aki escala, y ta puntra “ki mishi un persona cu problema di adiccion hunto cu  adultonan mayor (vulnerabel) como pashent?” Tambe ta puntra si e adicto aki lo por a combina su  remedi y/of droga of remedi di otro pashent, cu por a causa su agresion abrupto? Pues hopi pregunta  sin contesta. Casnan di cuido regular ta diseña pa ofrece un ambiente trankil, di paz y di atencion  medico preventivo of di mantencion pa nos adultonan mayor. Pa introduci un persona cu un of otro  adiccion severo den e mesun espacio aki, sin personal y e infrastructura adecua, ta un receta pa  desaster. E falta di supervision specialisa ta resulta den situacionnan unda e adulto mayor, cu ta den  un posicion vulnerabel, ta keda exponi na tension, insiguridad y peliger di Abuso físico cu sigur  abuso emocional/psicologico. Esaki na su turno sigur tambe lo tin su influencia riba e estado mental  di e habitantenan di e cas di cuido aki cu tambe mester ordo atendi profesionalmente,  preferibelmente No cu mas remedi ariba e cantidad cu ya e pashent ta usa. 

Falta di capacidad y maneho di cuido responsabel 

E calamidad na Tanki Leendert ta subraya e necesidad urgente pa Minister di Salud Publico,  Asuntonan Social, Cuido di Adulto Mayor y Maneho di Adiccion y su departamentonan y e Gerencia di e cas di cuido mes reevalua nan maneho. Fuera di e falta di personal capacita pa atende crisis di  adiccion, e falta di profesionalismo ta asina bisto. Un cas di cuido regular no por y no mester fungi  como un centro di rehabilitacion of di crisis mental sin e certificacion y e medidanan di siguridad  rekeri. 

Exigencia pa accion inmediato 

E incidente aki mester sirbi como un punto di maximo urgencia pa e ministerio aki y autoridadnan  competente na Aruba. Ta imperativo pa: 

• Separa e dos tipo di cuidonan aki for di otro: No por permiti mescla pashentnan cu  necesidadnan intensivo cu pashentnan mas fit. Esaki lo crea un inseguridad structural bou e habitantenan. 
• Implementa protocol estricto: Establece guia hopi cla riba ken mag y ken no mag wordo  admiti pa traha den e cas di cuido di adulto mayor. 
• Evalua miho e siguridad: Gobierno mester rRevisa e capacidad di e gerencia di tur  casnan di cuido pa garantisa cu un situacion asina hamas bolbe tuma luga. 

Desde 2012 Fundacion Alzheimer Aruba (F.A.A.) ta activo riba e topico di Abuso di Adulto  Mayor. Den e cuadro aki a lansa e Proyecto “BISA NO NA MAS ABUSO DI ADULTO  MAYOR” y ta sali cu e lema “NO EXCUSE FOR ELDER ABUSE!”.  

No ta pasa un siman cu F.A.A. ta ricibi kehonan di abuso of ta wordo notifica di esaki. Den e  grupo aki tin hende tambe cu ta expresa miedo pa sali padilanti cu nan ta wordo abusa di abuso of  negligencia como pashent, Miedo pa motibonan di entre otro: revancha, menasa, etc. di pasa  mescos cu of peor na man di un profesional. E angustia y rabia expresa tambe den medionan  social ta mustra den direccion cu a bira tempo pa mustra malcontento y vocifera contra abusonan  comete na Adulto Mayor y duna un bos na esnan cu ta sufriendo den silencio.  

Derecho riba cuido optimal: tur Adulto Mayor merece un bida digno, di calidad nutricion  adecua pa su salud, y trato cu respet. E motibo ta paso ta nan a traha e sociedad cu awe  comunidad por gosa di dje. Mayoria Adulto Mayor cu a duna tur nan esfuerzo pa yuda construi e  Aruba di awe a paga belasting, educa nos hobennan, esmas (hopi di nan) a spaar cu e tiki cu nan  por a spaar pa por tin algo pa mañan pa por laga pa nan yuinan. P’esey ta na su luga y deber di un gobierno responsabel pa cumpli y respeta derecho humano di tur ciudadano y soro pa un bida cu  dignidad y un bon salud. Pa esnan cu ta pa bay den un cas di cuido, e tarea di un gobierno mester  ta pa cumpli cu e obligacion y responsabilidad di con casnan di cuido ta wordo opera, conforme  di leynan (landsverordening) “Proclama Legalmente” y cu reglanan di un gobierno transparente.  Gobierno lo faya si NO tin control suficiente y adecua riba cuido deficiente y Abuso di Adulto  Mayor. 

Leynan importante di “Inspectie Volksgezondheid Aruba” (IVA) relaciona cu casnan di  cuido: Tin diferente rapport publica, entre otro: Kwaliteitszorg (LV 2014 no. 74) y  Verzorgingshuizen (LV 2015 no.61). 

Desde 2017/2018 IVA ta publica diferente rapport relaciona cu e cuido na e Casnan di Cuido. Por  ehempel: “Eindrapport Langdurige zorg” (2018), “Als zorg levens kost: calamiteiten in  verzorgingshuizen” (Rapport Inspectie Volksgezondheid Aruba GEH-2025/2439; Definitief 24  november 2025). E resultado di e rapportnan, publica aki, ta rekeri mas accion y guia pa cu un  maneho y formacion adecua di e empleadonan den casnan di cuido. E raportnan aki ta papia di e  necesidad di efectua e sistema di siña di e fayonan di incidentenan / calamidad den practica. Aki  tin necesidad di bin cu accionnan fuerte pa logra di evita Negligencia y Abuso di Adulto Mayor.

Ta di lamenta cu na 2026 na Aruba ainda tin mucho incidente y calamidad den cuido (den casnan  di cuido, na cas, hospital, etc.), cu No ta acceptabel y cu ta trata di Abuso y Negligencia di Adulto  Mayor. Algun ehempel ta entre otro: E cantidad di adulto mayor cu ta expresa su malcontento y  desconfiansa cu ta sigui subi drasticamente, pa e gran motibo cu NO ta tuma pasonan necesario  pa para e crecemento NO CONTROLA di casnan di cuido cu hendenan NO profesional (sin  conocemento suficiente con pa cuida un adulto mayor y esnan vulnerabel, pa pasa angua, pa  distribui remedi na pashentnan den e cas di cuido, etc, etc.). 

Loke falta ta e enfoke riba accionnan bon defini (por ehempel tipo S.M.A.R.T. Specifico, cu ta  midi progreso, implementacion, ta alcansabel, ta realistico y tangible). 

E calamidad di algun dia pasa, cu consecuencia severo di maltrato di un Adulto Mayor cu ta teme  pa su bida, a resulta di encarcela e agresor pa investiga e suceso. Den comunidad preguntanan ta  existi di kico por a causa e cambio diripiente di comportacion di e agresor (esaki por ta su remedi den combinacion cu droga?, etc.). Otro pregunta ta: “ki mishi un adicto den un cas di cuido di  

adulto mayor? Y tambe: Si ta bini –banda di investigacion penal y civil– un investigacion interno  di IVA y e instancia di cuido, manera ta describi den e rapport di IVA ariba menciona? Ta e Minister di Salud Publico, Asuntonan Social, Cuido di Adulto Mayor y Maneho di Adiccion  y su departamentonan ta esnan responsabel pa cumpli cu loke ta para den ley y e reglanan pa,  entre otro: casnan di cuido y negoshinan (cu trahadonan NO cualifica, cu ta lanta manera  paddenstoel). Y ACTUA conforme. 

Tin Adulto Mayor cu no tin e modo financiero pa mantene e pashent na cas y MESTER tuma e  paso (NO DESEA) di laga e ser keri bay den un Cas di Cuido, sabiendo cu den e sector ey tin  hopi abuso y negligencia ta sosode y ta keda cu sintimento di culpabilidad di no por a cumpli cu deseo di un cuido digno den un ambiente familiar y sigur.  

Esmas, ta hustamente e Pashentnan den un cas di cuido “deficiente“, esnan dependiente di negoshinan den cuido na cas, su famia, cu no ta experiencia un bida digno cu siguridad di su ser  keri, ta un victima di abuso y negligencia pa motibo di mal maneho y escases di suficiente  profesionalnan capacita. 

En corto: Siguridad y dignidad di nos adultonan mayor no por wordo poni na wega pa falta di  maneho legal y administrativo. P’esey e Maneho di Minister di Salud Publico, Asuntonan Social,  Cuido di Adulto Mayor y Maneho di Adiccion y su departamentonan (incl. IVA) ta responsabel y tin e deber di “ACTUA” y sirbi e bienestar y duna un calidad di bida y salud optimal di tur Adulto  Mayor pagado di belasting y residente di Aruba! 

Pa reacion riba e articulo aki: alzheimeraruba@gmail.com