Aksidente tragiko ta kosta bida di boluntario penshonado di CITRO

Dia 1 di ougústús CITRO Curaçao a risibí un melding dia ku tabata tin un boto di piskadó di Kòrsou riba e barankanan i tabata bezig ta senk na entrada di Fuikbaai. Doño di e boto a bula na awa i tabata purba di tene e boto for di e barankanan. Hasiendo esaki el a bai resultá bou di e boto, el a disparsé bou di awa i a fayesé.

E tabata huntu ku su señora a bordo di e boto. A bira konosí hopi lihé na CITRO ku e viktima tabata un penshonado kapitan di CITRO, un amigu di hopi persona na CITRO. Ku yudansa di dos sambuyadó di Sandals Diving (di kual un di nan tambe ta un kapitan di CITRO) e tripulashon CR1 a logra saka e viktima i a transladé pa e kas di boto.

Su señora, ku a keda tresé ku yudandansa di un seadoo a bordo di un otro boto di piskadó konosí, por a keda transportá pa e kas di boto kaminda nan a keda en espera di outoridatnan.

Tur miembro ku tabata enbolbí den e aksidente tragiko aki, a risibí asistensia di slachtofferhulp inmediato pa por prosesá e insidente aki na un manera adekuá.

CITRO ta deseá famia i tur amigu di Krik Parrel hopi forsa.