Kòrsou i Panamá ta dal e siguiente paso pa kolaborashon ekonómiko stratégiko

Bishita di Minister Moltó ta sigui despues di e bishita di Minister Middelhof na Panamá na aprel último

Willemstad – Di 19 te ku 21 di ougùstùs 2026, Kòrsou ta risibí un delegashon komersial grandi di Panamá, bou di liderato di e Minister di Komèrsio i Industria di Panamá, Julio Moltó. Mas ku 70 empresario i representante di institushonnan panameño ta biaha pa Kòrsou pa reunionnan di negoshi i kòmbersashonnan tokante, entre otro, komèrsio, logístika, abastesementu regional, seguridat alimentario, servisio i invershon.

E bishita ta un kontinuashon direkto di e bishita di trabou di Minister di Desaroyo Ekonómiko, Roderick Middelhof, na Panamá na kuminsamentu di e aña aki, i ta aliniá na e strategia di Ministerio di Desaroyo Ekonómiko (MEO) pa konektá Kòrsou mas sólido ku merkadonan di kresementu ku ta ofresé oportunidatnan den nos propio region.

Durante su bishita na Panamá na aprel, Minister Middelhof a bolbe pone e diálogo ekonómiko na un lugá prominente riba agènda. Den su reunion ku e Vice-Minister panameño di Komèrsio Eksterno, a papia tokante entre otro komèrsio, logístika, distribushon regional, zonanan di komèrsio liber i e posibilidatnan pa konektá Panamá i Kòrsou mas fuerte ku otro. Esaki tabata e promé kontakto formal na nivel ministerial entre e dos paisnan den mas ku 14 aña.

Minister Middelhof a proponé formalmente na Panamá pa kuminsá un diálogo ekonómiko struktural. Kòrsou ta mira Panamá, ku su Kanal di Panamá, e Zona Liber di Colón i su infrastruktura logístiko amplio, komo un entrada importante pa produkto, proveedó i fluho di komèrsio for di Latino-Amérika. Na mes momentu, Kòrsou por tin un ròl komplementario komo plataforma di komèrsio i logístika den direkshon di e merkadonan insular di Karibe. E enfoke aki ta kuadra tambe ku e Strategia Nashonal di Eksportashon di Kòrsou.

Promé Diálogo Panamá–Kòrsou
Un punto sentral durante e bishita ta e promé “Diálogo Panamá–Kòrsou tokante Komèrsio, Logístika i Invershon”, ku lo tuma lugá dia 20 di ougùstùs. Minister, instansianan gubernamental i representantenan di sektor empresarial di tur e dos paisnan lo identifiká huntu, posibilidatnan konkreto pa koperashon. Kompanianan lokal ku ta interesá ainda pa partisipá na e seshonnan por tuma kontakto via tirzah.doran@gov.cw pa mas tardá djárason 19 di ougùstùs.

Temanan lo inkluí, entre otro, komèrsio bilateral, logístika regional, koperashon entre zonanan di komèrsio liber, fasilitashon di komèrsio, kadenanan di suministro regional, seguridat alimentario, konekshonnan marítimo i aéreo, i promoshon di invershon.

Despues di e Diálogo, Minister Moltó i Minister Middelhof lo tene konsultanan bilateral i lo firma huntu un Karta di Entendimentu (Letter of Intent – LOI). Ku esaki, e Diálogo Panamá–Kòrsou lo wòrdu lansá formalmente i lo kuminsá un trayekto pa mas kòmbersashonnan di mesa rondó, un futuro Akuerdo ku Entendimentu i un plan di akshon bilateral.

Kompra mas serka di kas i apertura di merkadonan nobo
Pa Kòrsou, e koperashon ku Panamá ta relevante tambe for di e punto di bista di fortalesa ekonómiko i seguridat alimentario. E meta ta pa krea posibilidatnan pa mas abastesementu regional di produkto di bon kalidat i preisnan kompetitivo, i na mes momentu desaroyá un fluho nobo di komèrsio i distribushon entre Latino-Amérika, Kòrsou i e otro partinan di Karibe. E LOI ta menshoná eksplísitamente fortalesimentu di kadenanan di suministro regional i seguridat alimentario komo áreanan di koperashon.

Minister Middelhof ta kontentu ku su invitashon na Panamá a wordu aseptá:
“Na aprel nos a bai Panamá ku un mensahe kla: Kòrsou ke usa su relashonnan ekonómiko den region di un manera mas aktivo i stratégiko. Kuater luna despues, nos lo risibí Minister Moltó i un grupo grandi di empresario i institushonnan panameño na Kòrsou. Esaki ta presisamente loke nos ke logra: trese merkadonan ku tin potensial mas serka di nos empresarionan i nos pueblo. Panamá por ofresé nos akseso na produktonan di bon kalidat i preisnan kompetitivo i na proveedónan nobo, miéntras Kòrsou, for di su posishon stratégiko, por krea oportunidatnan pa komèrsio i distribushon na otro merkadonan den Karibe.”

E mishon ta kuminsá dia 19 di ougùstùs ku reunionnan di negoshi i un apertura ofisial. Dia 20 di ougùstùs lo tin e Diálogo Panamá–Kòrsou, siguí pa e konsultanan ministerial bilateral, firmamentu di e Akuerdo di Entendimentu i un deklarashon konhunto na prensa.

E bishita di Minister Middelhof na Panamá i e bishita di regreso di Minister Moltó ta ilustrá e strategia ekonómiko regional di MEO: konektá Kòrsou aktivamente ku merkadonan ku tin potensial, habri portanan institushonal i kombertí e relashonnan aki den posibilidatnan konkreto pa komèrsio, invershon, logístika i fortalesa ekonómiko.