Petishon pa respetá barikada na sitionan di insidente 

KUERPO POLISIAL KÒRSOU 

KOMUNIKADO DI PRENSA

275/2026

24 ougùstùs 2026 

Petishon pa respetá barikada na sitionan di insidente 

Polis ta tumando nota ku te ainda na diferente sitio di insidente, no ta tur  siudadano ta respetá barikadanan ku polis pone pa por hasi  

investigashon. 

Un sitio di insidente ta un òf mas área òf un òf mas lugá kaminda un  krímen a tuma lugá i riba òf den kua investigashon mester keda hasí, pa  por saka’fo ku eksaktitut kiko a sosodé i kon esaki a sosodé. 

Riba un sitio di krímen tin testigunan silensioso ku huntu ku otro  métodonan di investigashon, mester yega na solushon di e kaso ku  detenshon di e sospechoso(nan) i konfiskashon di entre otro e opheto ku  kua e krímen a keda kometé. 

Na momentu ku polis yega, e ta sera e área mas amplio posibel, pa asina  ei por inkluí i protehá mas tantu posibel e evidensianan ku a keda tras  despues di e akto. 

E área aki ta wòrdu será mayoria bia ku un sinta hel ku pretu ku ta indiká  “No krusa e liña aki”. 

Tin bia na momentu ku polis yega, ainda e peliger ta èksistí. Pues e echo ku  ta tene públiko na distansia, ta pa su propio seguridat tambe. 

Tene kuenta ku si den e área ku polis sera tin establesimentunan den  operashon, polis por duna instrukshon ku tur hende (pues tantu kliente  komo trahadó), mester permanesé den e negoshi te na momentu ku  investigashon permití ku nan por sali.

Personanan ku mester haña aksesibilidat na e luga di krímen, manera entre otro dòkter di polis, agensia funeraria, yudansa pa víktima èts., ta  wòrdu indiká kon pa kana i yega aserka, via di un ruta ílogiko, pa evitá  kontaminashon di e sitio inesesariamente. 

Insidentenan ku tuma lugá riba kaminda públiko òf di kual e área ta wòrdu  será inkluyendo kaminda públiko, tin komo konsekuensia ku polis mester  desviá e tráfiko. 

E instrukshon ku polis ta duna mester keda siguí inmediatamente i lo no  por hasi ekspeshon pa ningun usuario na e momentu ei. 

Tampoko si bo kas ta keda den e área ku a wòrdu será dor di polis. E kaminda mester keda liber i tráfiko mester flui, pa duna akseso na  vehíkulonan di emergensia ku mester yega na e sitio pa duna promé  asistensia. 

P’esei e apelashon pa no para na e punto di desviashon i hasi e polis preguntanan manera te ki ora e kaya ta wòrdu habrí bèk òf kiko ta loke a  pasa. 

Esaki ta stroba bon desaroyo di e tráfiko. 

Finalmente polis ta konta riba koperashon di tur siudadano na momentu  ku un krímen tuma luga. 

Huntu ku otro instansianan ku ta atendé kasonan di emergensia, polis mester por traha den tur libertat pa: 

➢ Skapa bida di víktima(nan); 

➢ Kontené i eliminá e peliger ku ta eksistí na e momentu ei; 

➢ Kuida i protehá e sitio di krímen pa garantisá un bon investigashon; ➢ Restablesé òrdu bèk mas pronto ku ta posibel den e área.