GMN ta alertá: seis warawara morto hañá pa uzo di venenu

Willemstad – Ministerio di Salubridat, Medio Ambiente i Naturalesa (GMN) ta hasi un yamada urgente na komunidat pa no uza veneno eksesivo pa kombatí kachó salbahe òf otro animalnan ku ta kousa problema. E motibu ta un serie di deskubrimentu preokupante. Den e último periodo a haña seis warawara morto, di kual tres tabata warawara infantil. Ministerio tin gran preokupashon pa e konsekuensianan ku uzo eksesivo di venenu tin pa nos flora i fauna lokal.

GMN ta komprondé ku tin situashonnan kaminda kachó ku ta kana sin doño por kousa daño na krio di bestia, propiedad òf otro animalnan. Sinembargo, venenu ta un método sumamente peligroso, ku konsekuensia serio i hopi biaha ireversibel pa nos naturalesa i medio ambiente.

Venenu no ta afektá solamente e animal ku bo ke eliminá

E seis warawara morto no ta un kaso isolá debí ku e venenu no ta traha selektivo. Banda di paranan yagdó, tambe animalnan silvestre i animalnan doméstiko ta na peliger. Dor ku venenu ta plama via e kadena alimentisio, un solo animal venená por bira kuminda pa e siguiente. Esaki ta resulta den un reakshon di kadena ku ta pone e eksistensia di vários espesie na peliger. 

Ademas, venenu ta forma un riesgo direkto pa hende. E supstansia por kontaminá medio ambiente i por kousa peliger pa mucha, adulto i animalnan doméstiko ku ta drenta den kontakto kuné.

Tin otro manera pa atendé ku e problemátika

GMN ta pidi tur hende ku ta eksperensiá problema ku kachó salbahe òf di mondi, spesialmente ora tin atake na krio di bestia, pa NO uza venenu, sino pa reportá e situashon na un manera sigur i responsabel na e instanshanan kompetente. Asina por evaluá e situashon i buska un solushon adekuá.

GMN ta enfatisá ku protekshon di nos naturalesa ta un responsabilidat di nos tur. Kada animal den nos ekosistema tin un tarea, i uzo iresponsabel di venenu por kousa daño ku ta yega hopi mas leu ku e problema original.

GMN ta pidi komunidat enfatikamente pa no uza, laga atras òf pone venenu na sitionan kaminda hende òf otro animalnan por alkans’é. Protekshon di nos naturalesa ta un responsabilidat di tur nos.