En bista di insertidumbre den komèrsio mundial i un bahada sperá den reserva di divisa CBCS ta ahustá su medidanan di maneho monetario
No. 2026-030
En bista di insertidumbre den komèrsio mundial i un bahada sperá den reserva di divisa CBCS ta ahustá su medidanan di maneho monetario
WILLEMSTAD/PHILIPSBURG — Dia 17 di sèptèmber 2026, Centrale Bank van Curaçao en Sint Maarten (CBCS) a tuma e desishon di oumentá su tasa di interes ofisial (‘beleningsrente’) 1 te na 4,50% i mantené e porsentahe di reserva obligatorio na 18,50% sin kambio. A tuma e desishon akí mirando e bahada ku ta premirá den reserva di divisa di nos union monetario pa 2026, e insertidumbre ku tin ainda tokante polítika komersial internashonal i e tenshon geopolítiko persistente. Ademas, e oumento akí ta sigui e desishon ku Reserva Federal Estadounidense a tuma na sèptèmber pa hisa su tasa ofisial ku 25 punto básiko. Fuera di esei, CBCS a ahustá su programa di sertifikado di depósito (CD) ku e meta di redusí e kosto di apsorbé likides ekseso den e sistema bankario i fortifiká efektividat di maneho monetario.
Te ku 31 di ougùstùs 2026, reserva ofisial bruto a oumentá ku Cg 468,1 mion. No opstante, ta proyektá un bahada di aproksimadamente Cg 332 mion pa 2026. E kambio akí ta prinsipalmente debí na sierto retiro di Estado Hulandes for di su kuenta na CBCS i tambe na un bahada den transferensia neto di kapital. E retironan di Estado Hulandes ta relashoná ku repatriashon di fondo ku a bini ta akumulá riba su kuenta na CBCS, prinsipalmente di e pagonan di interes i kapital ku gobièrnu di Kòrsou i di Sint Maarten. P’esei, i teniendo kuenta tambe ku e oumento proyektá den importashon di produkto i servisio, ta premirá ku e nivel di reserva lo baha, di moda ku e kobertura di importashon lo baha di 4,7 luna na fin di 2025 te na 4,3 luna na desèmber 2026. No opstante, segun proyekshon, esei lo no afektá solides di e kobertura di importashon, ku lo mantené su mes riba e norma di tres luna.
Apesar ku ta proyektá un bahada den reserva ofisial bruto, ta premirá ku posishon di divisa di nos union monetario lo keda sólido i lo kontribuí na un posishon ekonómiko stabil en relashon ku estranheria. No opstante, ainda ta eksistí sierto faktor ku por tin un efekto negativo. Fuera di tenshon geopolítiko i e trastornonan nobo ku por presentá den merkado energétiko, tenshon komersial internashonal i e insertidumbre relashoná ku polítika di derecho di importashon (‘tarifa’) por suak demanda eksterno, pone kosto di importashon subi i okashoná un oumento di preshon inflashonario na Kòrsou i Sint Maarten. Ademas, si Estádos Unídos apliká un maneho monetario mas restriktivo den kaso ku e preshon inflashonario no baha, esei por hiba na kondishon di finansiamentu internashonal mas stringente ku na nan turno lo okashoná un oumento di kosto di finansiamentu eksterno ku lo limitá e posibilidatnan di finansiamentu pa Kòrsou i Sint Maarten.
En bista di esaki, i siguiendo e desishon di Reserva Federal Estadounidense pa hisa nan márgen di tasa ofisial te na 3,75% – 4,00%, CBCS a oumentá su tasa di interes ofisial te na 4,50%,
1 Tasa di interes ofisial’ ta e tasa ku e bankonan komersial ta paga ora nan fia serka CBCS.
manteniendo asina un diferensia di 50 punto básiko riba e tasa federal. E desishon di Reserva Federal ta un refleho di e preshon inflashonario persistente i e oumento di insertidumbre riba perspektiva ekonómiko. Por lo demas, CBCS a mantené e porsentahe di reserva obligatorio na 18,50% pa asina sigui hiba un maneho monetario balansá.
Alabes, CBCS a hasi algun ahuste na su programa di sertifikado di depósito (CD) pa adaptá e instrumento akí mas tantu na e kondishonnan di merkado. CD ta instrumento ku ta generá interes i ku CBCS ta ofresé na e bankonan komersial pa un periodo determiná, pa apsorbé ekseso di likides for di sistema bankario. Ademas, e programa di CD ta ofresé e bankonan komersial un alternativo pa koloká i tene nan likides riba merkado lokal, en bes di invertí nan fondonan den eksterior. CD ta un di e instrumentonan di merkado ku CBCS ta usa pa manehá e situashon di likides den sistema bankario i, di e manera ei, influensiá e manera ku e bankonan komersial por
suministrá krédito.
CBCS a ahustá e programa di CD ku e meta di redusí e kosto di apsorbé ekseso di likides for di sistema bankario, mehorá e maneho di likides i oumentá e efektividat di su maneho monetario riba merkado, sin desviá for di su ophetivo prinsipal di salvaguardá stabilidat di nos tasa di kambio i manten’é un nivel adekuá di reserva. Mas detaye tokante e ahuste hasí na e programa di sertifikado di depósito lo sigui den un sirkular ku Banko lo publiká riba tema monetario.
CBCS lo sigui vigilá e desaroyonan ekonómiko doméstiko i internashonal djaserka i lo ahustá su instrumentonan di maneho monetario si ta nesesario.
Willemstad, 18 di sèptèmber 2026
CENTRALE BANK VAN CURAÇAO EN SINT MAARTEN
