Tim di krísis a praktiká ku simulashon di aksidente.

Willemstad – Riba djadumingu, 20 di sèptèmber 2026, e tim di krísis di Kòrsou (CRBo) i Direktorado di Kontrol di Riesgo i Maneho pa Kalamidat (DRR) a simulá un aksidente grandi kaminda diferente víktima tabata envolví.

Pa por a brinda yudansa lihé i na un manera koordiná durante e simulashon, a aktivá diferente organisashon ku ta forma parti di e tim di krísis di Kòrsou. A aktivá Brantwer di Kòrsou, Kuerpo Polisial, Ministerio di Salubridat, Medio Ambiente i Naturalesa, Ministerio di Desaroyo Sosial, Labor i Bienestar, departamentunan di Ministerio di Asuntunan General, Krus Kòrá Kòrsou i otro organisashonnan pa e simulashon akí.

Práktika i simulashon ta eksigensianan ankrá den lei di kalamidat i plan di krísis, ku ta kai bou di  responsabilidat di Minister di Asuntunan General. Ku e simulashon akí e tim di krísis por praktiká pa haña mas konosementu i ta mas efektivo i efisiente den un situashon di krísis òf kalamidat. Ta bon pa sa kon koordiná i traha ku otro den un struktura multidisiplinario kaminda hopi organisashon mester ehekutá diferente medida i desishon pareu.

E simulashon e biaha akí a konsentrá riba e prosesonan primordial di maneho di krísis manera: alertá, alarmá, aktivá, koordiná i liderá. Lo evaluá resultado di e simulashon despues konforme reglanan i ta kompartí e siñansanan for di e treinen. E siñansanan akí ta sirbi pa sigui mehorá prosesonan di tur organisashon ku a partisipá.

Djasabra, 17 di òktober próksimo nos komunidat tambe por haña un ñapa di e prosesonan akí durante di e ‘Ami Ta Prepará Expo’ i e ‘Ami Ta Prepará Scavenger Hunt’. Partisipantenan na ‘Scavenger Hunt’ lo bishitá algun organisashon di e tim di krísis di Kòrsou i tuma parti aktivamente den e prosesonan akí. Di un forma aktivo tur e timnan partisipando lo siña prinsipalmente kon protehá nan mes durante di un krísis i tin chèns di gana premionan atrakativo.

Tim di Krísis ta gradisí tur organisashonnan ku a partisipá na e simulashon pa e gran aporte i disponibilidat. Alabes ke motivá pueblo di Kòrsou pa sera nan tim i bin demostrá ku boso tambe ta kla pa kualke reto. Inskribí awor via di e link akí: gobiernu.co/RegistrashonScavengerHunt te ku 13 di òktober pa bo partisipá. Pa mas informashon di ‘Ami Ta Prepará Expo’ i ‘Ami Ta Prepará Scavenger Hunt’ por bishitá Ami Ta Prepará riba Facebook i Instagram.