SPRINT TA RESPRESENTÁ E SIGUENTE PASO DEN PROFESHONALISÁ SERVISIO PÚBLIKO

Willemstad — Mehorashon kontinuo i mas profeshonalisashon di e servisio direkto na siudadano ta para sentral durante e ‘SPRINT’ ku ta tuma lugá na e Ministerio di Gobernashon, Planifikashon i Servisio Públiko di 21 di sèptèmber te ku 2 di òktòber. Den koperashon ku diferente instansianan di Ministerio di VVRP, Ministerio di AZ i e kompania di software ‘Xxllnc’, amtenarnan ta traha huntu pa mehorá e prosesonan den e sistema digital ‘e-CuraCase’.

E seshonnan di SPRINT ta trata di trabou práktiko kaminda amtenarnan ta traha konhuntamente pa digitalisá e manera pa hasi un petishon. Esaki ta nifiká ku huntu nan ta analisá situashonnan konkreto, investigá na unda e prosesonan por konektá ku otro mas mihó i tambe orientá riba informashonnan i datonan relevante di e proseso interministerial.

Tur informashon den un fail digital i siña huntu for di ehèmpelnan di práktika:

Un parti importante di SPRINT ta ‘zaakgericht werken’. Esaki ta nifiká ku tur informashon di un petishon ta keda wardá petishon den un fail digital. Dor di registrá i kompartí informashon di e mesun manera, amtenarnan di diferente instansia òf ministerio por traha mihó huntu. Tambe por yuda siudadanonan i empresarionan mas lihé i indiká ta e status di nan petishon.

Durante e SPRINT, amtenarnan ta praktiká ku ehèmpelnan for di nan trabou diario. Nan ta analisá situashonnan konkreto i ta evaluá kiko lo por mehorá. Esaki ta organisá e servisionan di gobièrnu na un manera uniformá i transparente ku por sigui fortalesé e koperashon entre instansianan.

E programa di SPRINT tambe ta konektá ku e ambishonnan importante di e programa di gobernashon aktual: un gobièrnu ku ta funshoná di un manera konfiabel, transparente i efisiente, ku un servisio moderno ku ta kumpli ku e nesesidatnan di siudadanonan i empresarionan.

Digitalisashon tambe ta hunga un ròl importante: gobièrnu ta sigui modernisá e prosesonan i maneho pa sirbi e komunidat lihé i di un forma adekuá.