Hendenan for di diferente parti di Aruba a yega Savaneta pa disfruta di cuminda di lama, gastronomia, musica, cultura y un ambiente familiar, convirtiendo e festival den un berdadero encuentro di comunidad y un plataforma pa actividad economico local.

Loke a cuminsa na 2025 como un iniciativa di Fundacion Savaneta Prome Capital pa pone pesca y identidad di Savaneta mas den luz, ta creciendo den un evento cu ta reuni piscadonan, comerciante, emprendedornan, artesanonan, famianan y bishitantenan for di henter Aruba.

E crecemento aki ta resultado di confiansa y colaboracion. Ministerio di Finansa, Asunto Economico y Sector Primario, a sostene e iniciativa desde su prome edicion cu e conviccion cu Savaneta Seafood Festival por bira un plataforma duradero pa fortalece comunidad y, na mes momento, crea oportunidad economico rond di pesca y producto local.

“Loke nos a mira na Savaneta ta exactamente loke nos kier logra, un comunidad cu ta bini hunto, nos piscadonan y empresarionan cu ta haya un plataforma, producto local cu ta haya visibilidad y actividad economico cu ta keda den comunidad. Mi ta sumamente contento di mira con Savaneta a brasa e iniciativa aki y con hendenan for di tur parti di Aruba a bini pa forma parti di dje. Esaki ta duna nos mas motivacion pa sigui inverti den e festival y traha pa hacie mas grandi y mihor,” Minister di Finansa, Asunto Economico y Sector Primario Geoffrey Wever a declara.

Savaneta Seafood Festival ta mustra cu inversion den sector primario por tin un efecto cu ta bay mas leu cu pesca solamente. Ora un piscador por presenta su producto, un empresario por bende su cuminda, un artesano por ofrece su producto y cientos di bishitante ta yega den un comunidad, ta genera actividad economico directamente na nivel local.

E vision di Sr. Norman Thijsen y su team di Fundacion Savaneta Prome Capital conhuntamente cu gobierno, ta pa fortalece e cadena completo, for di piscamento y producto local, te na gastronomia, comercio y experencia cultural.

Savaneta Seafood Festival ta un expresion concreto di e maneho ey: no solamente papia di fortalece sector primario, sino crea espacionan unda e sector por conecta directamente cu consumidor, empresario y comunidad.

E festival tambe ta forma parti di un vision mas amplio pa pesca. Inversion den infrastructura pa piscadonan, promocion di producto local y iniciativanan pa pasa conocemento di pesca na generacion siguiente ta contribui na un mesun meta, cual ta, duna pesca local un posicion mas fuerte den futuro economico di Aruba.

Minister Wever ta expresa un gradicimento special na Sr. Norman Thijsen y su team di Fundacion Savaneta Prome Capital, na tur partner publico y priva, y especialmente na cada persona cu a bishita e festival, cada piscador, vendor, empresario, artesano y participante cu a pone nan confiansa den e iniciativa.