KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Maneho di Calor pa fortalece proteccion di adultonan mayor den casnan di cuido

Maneho di Calor pa fortalece proteccion di adultonan mayor den casnan di cuido

ORANJESTAD – Riba Dia Internacional di Adulto Mayor, Ministerio di Salubridad Publico, Asunto Social, Cuido di Adulto Mayor y Maneho di Adiccion, hunto cu National Climate Resilience Council (NCRC), Directie Ouderenzaken (DOZ) y Directie Volksgezondheid (DVG), a introduci oficialmente e Maneho di Calor pa casnan di cuido.

Ta conmemora Dia Internacional di Adulto Mayor tur aña riba 1 di october y ta pone atencion riba bienestar, dignidad y participacion di adultonan mayor den sociedad.

E Maneho di Calor tin como meta pa preveni efectonan negativo di calor riba salud y bienestar di adultonan mayor y pa yuda casnan di cuido prepara y actua na tempo durante periodonan di calor intenso.

Adultonan mayor ta mas vulnerabel pa efectonan di calor. Cu edad, e curpa ta regula temperatura menos facilmente, mientras condicionnan cronico y uzo di cierto medicamento por aumenta e riesgo pa complicacion di salud. Pa e motibo aki, prevencion y accion na tempo ta esencial.

E Maneho di Calor ta resultado di cooperacion entre DOZ, DVG, Departamento Meteorologico Aruba (DMA), NCRC, International Panel on Deltas and Coastal Areas (IPDC), Impact Blue Foundation y Climate Adaptation Services (CAS).

Como parti di e maneho, casnan di cuido lo haya stacionnan meteorologico pa monitorea temperatura y humedad. Cu financiamento di IPDC, e lo pone stacionnan gratuitamente na disposicion di e institucionnan, mientras lo comparti e data genera directamente cu DMA.

Ora e hitte-index ta indica di yega of pasa e limite determina durante varios dia consecutivo, DMA y DOZ lo manda un advertencia na casnan di cuido pa e Protocol di Calor por drenta na vigor.

Pa sostene e personal di cuido, a desaroya material informativo cu señalnan di stress debi na calor, agotamento debi na calor y ataca di calor, como tambe indicacionnan practico pa reconoce riesgo y actua na tempo.

Pa e Minister di Salubridad Publico, Asunto Social, Cuido di Adulto Mayor y Maneho di Adiccion, Melvin Wyatt-Ras e Maneho di Calor ta un paso importante pa sigui fortalece prevencion y calidad den cuido, cu salud, seguridad y dignidad di adultonan mayor como punto central.

E Maneho di Calor ta dirigi inicialmente na casnan di cuido pa adultonan mayor. E intencion ta cu den futuro por amplia e maneho pa inclui otro localidadnan y areanan publico cu adultonan mayor ta bishita.

Cu e maneho aki, Gobierno y e diferente partnernan ta pone un base mas structura pa proteha salud, seguridad y bienestar di nos adultonan mayor.

 

639114718427035"
639114718427035"