Escritor Arubiano lo duna charla pa docentenan di Havo/Vwo na Hulanda

Escritor Arubiano lo duna charla pa docentenan di Havo/Vwo na Hulanda
Dia 4 di november proximo e autor internacionalmente reconoci Quito Nicolaas lo duna un charla y un tayer na e ciudad di Utrecht. Esaki lo tuma luga durante un Dia di estudio pa docentenan di Havo y VWO na Hulanda. E tema cu sr. Nicolaas lo papia ariba ta con pa inclui Literatura Caribense den e curriculo di skolnan secundario manera Havo y Vwo.

Pa e autor – como unico cu lo duna un lectura riba e tema aki – esaki ta un encargo cu mester traha tempo pe. Esaki ta rekeri hopi preparacion pa duna un charla di nivel y un tayer practico unda e docentenan ta cera conoci cu instrumentonan cu por uza den e materia di literatura na skol. Ta pa prome biaha cu Literatura Caribense ta figura riba e lista di temanan pa ser trata durante un Dia di estudio.

Como preparacion pa e dia aki lo sali un articulo di sr. Nicolaas publica den e revista Levende Talen di luna di october, den cual e ta delinea algun punto di salida pa su charla. Ta mas cu claro cu e lo trata algun di e autornan di Aruba y Corsou, pa mustra riba e literatura di e islanan y e temanan parecido den ambos literatura. Acerca pa argumenta cu ta importante pa alumnonan na Hulanda cuminsa lesa obranan di nos autornan local. Despues cu den añanan ´70 e autornan Tip Marugg, Boeli van Leeuwen y Frank Martinus Arion tabata hopi popular, e interes pa nos literatura a cay enormemente.

Formando parti di un Reino Hulandes, alumnonan di scolnan secundario atravez di literatura por cera conoci cu e cultura, literatura y historia di e partnernan den Reino. Ademas pa e materia di Ingles, sr. Nicolaas lo haci un referencia na e literatura Ingles rico di St. Maarten. Mescos lo dedica atencion na e publicacionnan historico cu nos islanan conoce pa pone e desaroyonan den un contexto historico. Alumnonan cu termina nan estudio den futuro mester sa algo di e literatura Caribense, Europeo y Mundial, asina cu nan tin mas conocemento di e diferente culturanan cu ta existi na Hulanda y cu nan por funciona tur caminda.

sr. Nicolaas kende su obranan a keda inclui na juni 2016 den e Encyclopedia di Biografia di autornan Caribense y Afro-Latino Americano di Universidad di Oxford, ta sumamente contento cu e reto aki pa contribui di e manera aki cu e compromiso cu e tin cu Literatura Caribense y su isla natal Aruba.