Rekorido den barionan di Otrabanda

Rekorido den barionan di Otrabanda 

Djasabra, 27 di mei 2017, miembronan di frakshon di PAR, MAN i PIN, huntu ku e ministernan ku lo sinta entrante djaluna benidero, a hasi un rekorido den Otrabanda, riba invitashon di Federashon Otrabanda. E delegashon a keda ampliá tambe ku miembronan di Plataforma Otrabanda, Unidat di Bario, DMO, Monumentenzorg, Pietermaai District & Skalo, algun ambtenaar di Minister di Ekonomia, SKO, GMN i SOAW.

E rekorido a kuminsá na Sentro di Bario Otrabanda, e delegashon a kana un pida den Rif. A mustra nan kasnan dekaí i riba e reto pa haña destinashon pa hospital biew. Konekshon di Megapier 2 ku Bredestraat. Kaya i trapinan dekaí na Ser’i Dòmi i den Otrabanda. Ghost town entre Kurá Hulanda i Keizershof. Grandinan desolá na Quintastraat. Inisiativanan di Casas Vivas. Nan a pasa bai Kortijn i Kura’i Shon Fil ku ta e parti mas dekaí di Otrabanda. 

Intenshon di e rekorido ta pa mustra e retonan ku e barionan aki ta konfrontá i ideanan ku habitantenan tin pa mehorá kalidat di bida den e barionan. Federashon Otrobanda ke traha konhuntamente ku Gobièrnu pa yega na desaroyo duradero i efektivo pa kada bario di Otrabanda. 

A keda di bin un proyekto di Infrastruktura finansiá pa EU ku ainda no a yega. Tin mester di hopi atenshon pa e hende. Den e area mas dekaí di Otrabanda tin 6 landfill, kasnan yen di persona ku ta permanesé ilegal riba nos isla i drogadiktonan, hopi insiguridat i kriminalidat. Na Ser’i Dòmi tin nesesidat pa transporte publiko, un espasio pa aktividat pa hobennan i atenshon pa e kasnan Tanten di Pater Brenneker. E kasnan aki tabata tin komo propósito pa ta un kas temporal pa famianan pa despues haña un kas via di FKP. Awendia e kasnan aki ta habitá apesar ku nan no ta den bon estado mas i e situahson no ta sano. Federashon Otrobanda lo sinta ku Fundashon Pader Brenneker pa wak un solushon pa en todo kaso mantené e kasnan aki. E famoso trapi na Ser’i Dòmi ku nos tur ta usa durante temporada di Karnaval, falta lus, mantenshon i mester mantené e area limpi. 

Otro mishon di Federashon Otrobanda ta ku Otrobanda mester keda i bira aksesibel pa esnan ku ke bin biba, ku partisipashon di habitantenan di bario i organisashonnan di bario. Mester promové desaroyo duradero i un desaroyo integral pa Otrobanda tantu físikamente i sosial, ku atenshon pa aspektonan ekonómiko. Mester stimulá mantenshon di patrimonio nashonal di Otrobanda komo parti di e desaroyo integral di Willemstad. 

Apesar di e tantísimo retonan manera, seguridat, limpiesa, kasnan dekaí i detorioro sosial, habitantenan ku ta forma parti di e diferente Komishonnan di Bario ta hasiendo nan máksimo esfuerso pa logra adelanto pa nan barionan. Asina ta perkurá pa tin diferente aktividatanan den e barionan: Na Sentro di Bario Otrobanda ta organisá aktividatanan manera Naschoolse Opvang pa muchanan te ku 14 aña; Na Ser’i Dòmi tin e sentro di Tio Selcio ku ta un lugá di rekreo pa muchanan den bario kaminda ku nan por sigui lès di kompiuter tambe; Na Dòmi tin aktividat na Klup Pastoral Sta. Famia un biaha pa siman pa habitantenan mayor di edat na kual mas òf menos 50 pa 60 persona mayor di edat ta partisipá. Den Dòmi tambe tin aktividat pa e hóbennan kaminda nan por hasi pintura riba murayanan di kas.

Tur bario ku e delegashon a bishitá tin aspektonan ku mester di atenshon, partikularmente den Dòmi e situashon di seguridat ta agudo.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: