KOMUNIKADO DI PRENSA DEBI NA KUATER UNIDAT DI PRODUKSHON DI AQUALECTRA DEN MANTENSHON I FALTA DI BIENTU, LO POR TIN SKARSEDAT DI KORIENTE E SIMAN AKI

KOMUNIKADO DI PRENSA
DEBI NA KUATER UNIDAT DI PRODUKSHON DI AQUALECTRA DEN MANTENSHON I FALTA DI BIENTU, LO POR TIN SKARSEDAT DI KORIENTE E SIMAN AKI
____________________________________________________________

Willlemstad- Debí ku unidatnan di produkshon di koriente di Aqualectra ta den mantenshon i tambe pa falta di bientu e siman aki, komunidat lo por eksperensiá kita i pone di koriente. Esaki na momentu ku e konsumo di koriente bira mas ku e kantidat di koriente disponibel durante dia. E pronóstiko aki no ta tene kuenta ku posibel aporte di Curacao Refinery Utility (CRU) ku koriente durante di e siman aki. E trabounan di mantenshon na e kuater unidatnan di produkshon ta altamente nesesario. E pronóstiko di bientu tambe lo baha mas, den transkurso di e siman. Tur esaki ta e kousa prinisipal ku ta premirá ku lo no tin sufisiente koriente pa kumplí ku e demanda di komunidat. Aqualectra ta hasi tur loke ta posibel pa finalisá mantenshon di e plantanan aki mas pronto posibel.

E unidat di produkshon nobo na Dokweg IIB, ku tin un kapasidat di 39 MW, lo aportá engrande pa oumentá e kapasidat di produkshon di koriente di Aqualectra di tal forma ku e ta redusí e risíko ku Aqualectra no por kumplí ku e demanda di koriente for di komunidat den futuro serkano.
E unidatnan aki ta den nan último fase di tèst i ta spera ku pronto nan lo por ta komplétamente den operashon i forma parti integral di e kapasidat di produkshon di Aqualectra.

Aqualectra ta spera komprenshon I ta pidi diskulpa pa e inkumbiniensia ku e situashon di produkshon di koriente por kousa e siman aki.