Kòrsou ta hasi esfuerso pa prepará su mes mihó riba un eventual derame di zeta

WILLEMSTAD – Kòrsou tin mester di un plan di emergensia nashonal pa derame di zeta. Durante e siman akí Gobièrnu di Kòrsou ta pone un paso importante pa yega na un plan nashonal, ku un tayer titulá ”National Workshop on the Contingency Planning & Implementation of the Oil Pollution Response Convention (OPRC)”. Partisipantenan na e workshop ta di diferente ministerio, entidatnan semi-gubernamental, sektor petrolero i organisashonan di medio ambiente. Ophetivonan di e kurso ta pa krea mas komprendementu, konosementu i koloborashon entre tur entidat i organisashon ku por tin algu di haber ku un derame di zeta.

Derame di zeta ta identifiká, den e Profíl di Riesgo di Kòrsou 2017-2022, komo un riesgo ku un probabilidat haltu i ku konsekuensia konsiderabel pa Kòrsou. Esaki debí na e tantísimo barkunan di petroleo, karga, krusero i asta botonan mas chikitu ku ta nabegá den nos awanan. Pero tambe nos mes industria petrolero i di e otro Islanan i paisnan den region ku tin industria petrolero.

Teniendo e ariba menshoná na konsiderashon, e konosementu atkerí na e workshop aki mester bai yuda e partisipantenan pa yega konhuntamente, na un plan di emergensia pa derame di zeta (National Oil Spill Contingency Plan) mas pronto posibel. Tambe dor di hasi ehersisio, basa riba e plan aki, e entidatnan lo prepará pa por duna mihó guia den kaso di un situashon di derame di zeta òf otro produktonan kímiko.

Gobièrnu ta dediká atenshon mas spesífiko na prevenshon i preparashon pa e riesgonan identifiká den e Profíl di Riesgo di Kòrsou. Esaki ku e meta pa por limitá daño personal, material i medio ambiente promé, durante i despues di kualkier krísis òf kalamidat ku por sosodé na Kòrsou. Organisashon i inisiativa di e tayer di e siman akí ta den man di Direktorado di Kontrol di Riesgo i Maneho pa Kalamidat (DRR) huntu ku Rac/Rampeithc-Caribe i International Maritime Organization (IMO).