Lo adoptá hóbennan na Kòrsou, Aruba i Boneiru: Digicel lo adoptá 60 mucha pa klínika di futbòl Real Madrid Digicel ta habri 2 kupo èkstra pa mucha muhé tambe por partisipá
Lo adoptá hóbennan na Kòrsou, Aruba i Boneiru:
Digicel lo adoptá 60 mucha pa klínika di futbòl Real Madrid
Digicel ta habri 2 kupo èkstra pa mucha muhé tambe por partisipá
WILLEMSTAD: Resientemente Digicel a ofisialisá su patrosinio pa e klínikanan di futbòl di Real Madrid riba tur tres isla, esta Kòrsou, Boneiru i Aruba. Primeramente lo start aki na Kòrsou durante di e periodo di 6 te ku 9 ougùstùs benidero, riba tereno di Vesta den bario di Sta Maria. Despues lo duna e klínika na Boneiru for di dia 12 pa 16 di ougùstùs i finalmente na Aruba den luna di òktober benidero. Djasabra awor entrenadornan di Real Madrid lo ta na Kòrsou, pa train i selekshoná e trainernan lokal. Huntu nan lo duna e klínika. Pa promové ku mucha muhé tambe por hunga futbòl, Digicel ta ofresé 2 kupo èkstra pa mucha muhénan di entre 8 i 9 aña di edat. Pa bin na remarke, mester reakshoná riba e video ‘Apuntante en el Real Madrid’ ku a wòrdu pone riba e página di Facebook di Digicel djarason 3 di yüni. Ta anunsiá e ganadónan djaluna 8 di yüli.
150 mucha lo partisipá na Kòrsou
Digicel su sosten na futbòl lokal i hóbennan ku ta praktiká e deporte ta kos di semper, kuminsando na Digicel Caribbean Cup aki na Kòrsou, te na Soccer Academy na Aruba i e sosten anual na klínikanan di futbòl na Boneiru. Di akuerdo ku Jorge Cuartas, e klínika di Real Madrid ta nifiká un oportunidat grandi pa e hóben lokal. Na Kòrsou 150 mucha lo partisipá i na Boneiru 85; e muchanan di entre 6 i 12 aña di edat lo partisipá den dos diferente kategoria. E klínika lo wòrdu organisá pa organisashon di futbòl lokal Vesta di Sta. Maria, konhuntamente ku Real Madrid. Na final di e klínika lokal 2 mucha/hóben, huntu ku nan coach lo biaha pa Spaña i einan partisipá na un klínika di Real Madrid.
Digicel ta kontentu di por adoptá 60 mucha pa e klínika
Digicel su kompromiso ku hubentut ta den tur merkado. “Nos lo adoptá 25 hóbennan na Kòrsou, 15 na Boneiru i 20 na Aruba. Pa e grupo aki, Digicel lo kubri tur e gastunan di partisipashon. Partisipando na e klínika, nan lo risibí un unifòrm, tur artíkulo di e ekipo spañó i algun dia di téknika i konosementu for di un di e mihó klupnan di futbòl na mundu. Esaki lo ta un soño realisá pa e hóben”. Den transkurso di añanan Fundashon Real Madrid a organisá alrededor di 474 klínika di futbòl den 45 pais. Mas di 47,853 hóben a benefisiá di e programa aki. E aña aki ta promé biaha ku ta organisá esaki riba islanan ABC. Sigui tur desaroyo riba e página di Facebook di Digicel www.facebook.com/DigicelCuracao p’abo tambe sinti e pashon di futbòl!
