Parlamentario Curtley Obispo: Presupuesto 2020 di Pais Kòrsou: preguntanan pa loke ta trata e Ministerio di Hustisia.

Presupuesto 2020 di Pais Kòrsou: preguntanan pa loke ta trata e Ministerio di Hustisia.

Durante e di dos dia di tratamentu di e Presupuesto 2020 di Pais Kòrsou, parlamentario Curtley Obispo a base di su análisis di sifra a konsentrá su preguntanan riba entradanan i gastunan di Kuenta Koriente di Pais Kòrsou pa loke ta trata e kapítulo di Hustisia. A base di esaki, parlamentario Curtley Obispo a hasi e siguiente preguntanan durante e reunion: 

(1) Ministerio Públiko: entradanan di 3.6 mion florin na aña 2018. Entradanan presupuestá aña 2020 pa 1.6 mion florin. Preguntanan: (a) dikon e bahada di 2.0 mion den entrada (aña 2020 kompará ku aña 2018) ?. (b) Entrada di but: e lei di pasa ku un vehíkulo den lus kòrá, kámara ta graba bo i bo ta haña un but. E lei ta kla den aña 2020 pa implementá esaki? Si òf No. Dikon si òf No?

(2) Bureau Intellectuele Eigendommen: entradanan di 4.4 mion florin na aña 2018. Entradanan presupuestá aña 2020 pa 0.9 mion florin.  Preguntanan: (a) Dikon e bahada di 3.5 mion den entrada (aña 2020 kompará ku aña 2018) ?; (b) Bureau Intellectuele Eigendommen a paga e 3.5 mion florin na Pais Kòrsou? Si òf No. Dikon si òf No?

(3) Staat van salarissen en sociale lasten di Ministerio Hustisia: ta presupuestá pa aña 2020 un total di 13.6 mion florin na overtaim. Di kual 10.0 mion florin ta presupuestá pa Kuerpo Polisial di Kòrsou. Preguntanan: (a) kuantu ámtenar lo por tuma den servisio di Kuerpo Polisial di Kòrsou na un balor di 10.0 mion florin?. (b) kuantu vakaturanan ainda tin habri na Kuerpo Polisial Kòrsou? (c) ta bai yena den aña 2020 e vakaturanan den Kuerpo Polisial Kòrsou?