Renaissance Curaçao Resort i Wind Creek Carnival Casino a fèrf muraya di stadion di Rif 

Renaissance Curaçao Resort i Wind Creek Carnival Casino a fèrf muraya di stadion di Rif 

 

WILLEMSTAD – Djarason mainta tabata masha spesial pa e tim di Renaissance Curaçao Resort i Wind Creek Carnival Casino.  Empleadonan di hotèl, casino i ehekutivonan di Wind Creek Hospitality tabata presente pa duna e muraya di stadion di Rif un ‘facelift’.  E kompania ta kere firmemente den duna bèk na e komunidat na unda e ta establesé. Ya for di apertura di Renaissance Curaçao den Otrobanda, mas ku 10 aña pasá, e kompania a sostené i inisiá diferente proyektonan sosial na benefisio di e área. Entre nan fèrfmentu di skol, akshonnan di limpiesa, rekoudashon di material pa skol, remodelashon di e sentro di bario i mas.  

 

Di akuerdo ku Angelo Martes, Direktor di Rekurso Humano, “Duna un aporte na nos komunidat ta un di nos balornan. Na komienso di un karera na nos empresa, e kolega ta keda motivá pa partisipá aktivamente den akshonnan komunitario. E aña aki fèrfmentu di e muraya di Rif ta nos promé proyekto. Ta nos meta pa hasi e estétika di e muraya mas vibrante di manera ku públiko ta haña e stadion mas atraktivo pa bishitá. Ademas di esei, e ta duna un aporte tambe na embeyesimentu di e área.” Propietarionan di Renaissance Curaçao Resort i Wind Creek Carnival Casino tabata di bishita spesialmente pa e akshon komunitario di djarason mainta i tabata kontentu di por duna un man. 

 

Stadion di Rif ta wòrdu usá aktivamente pa play-off. Renaissance Curaçao Resort i Wind Creek Carnival Casino ta di opinion ku deporte tin un ròl importante den kresementu i desaroyo di nos hóbennan. Ademas di duna un aporte na nos hóbennan i deporte lokal e ta atraktivo pa bishitantenan lokal i internashonal  ku ta frekuentá e área pa bishita e.o Renaissance, Mall, Casino i Movies. Pa e turistanan krusero esaki ta un ruta hopi trafiká; hopi bes, esaki ta e promé i e lastu impreshon di Kòrsou!