Subida desproporshonal di preis di bibidanan alkohóliko desde ku gabinete Rhuggenaath a subi “Omzet Belasting” (OB) i akseins riba e produktonan aki.

Na: Minister di Ekonomia i Turismo

Señora Giselle Mc. William

PRESENTE

 

Kòrsou, 19 di yanüari 2020

 

Tópiko: Subida desproporshonal di preis di bibidanan alkohóliko desde ku gabinete Rhuggenaath a subi “Omzet Belasting” (OB) i akseins riba e produktonan aki

 

Señora Minister, frakshon di MFK ta risibí hopi keho di siudadanonan riba e forma desproporshonal ku preis di bibidanan alkohóliko a subi, for di despues ku gabinete Rhuggenaath a tuma e desishon di subi OB i akseins riba e artíkulonan aki.

 

Frakshon di MFK tambe a a hasi su investigashon i nos a konstatá ku no solamente e preisnan a subi di forma desproporshonal pero ku tin diferensia nan grandi di preis entre e diferente establesimentunan.

 

No ta di mas menshoná ku meskos ku nos frakshon a indiká ku e medida aki lo no tin e konsekuensianan finansiero ku bo(so) gabinete lo kier logra kuné. Meskos e diferente órganonan di konseho a indiká.

 

Nos por mira ku e medida aki a generá un otro aspekto ku ta esun di spekulashon di preis ku komo konsekuensia e preisnan desproporshonal ku tin aktualmente riba merkado.

 

Hasiendo uso di artíkulo 96 di Reglamentu di Orden nos ta hasi minister Mc. William e siguiente preguntanan;

 

1. Minister ta na altura ku despues di e medida di subi OB i akseins riba bibidanan alkohóliko, ku e preisnan riba merkado a subi drástikamente?

 

1. Minister por informá Parlamento ku despues di e medida di oumento di OB i akseins, departamento di ekonomia a hasi kontrol riba produktonan alkohóliko?

 

1. Minister ta dispuesto pa aserka Fundashon na Konsumidó pa huntu ku ministerio di ekonomia pa hasi e kontrolnan nesesario den diferente establesimentu i publiká esaki nan? 

 

1. Minister ta dispuesto ku huntu ku Douane hasi kalkulashon riba e diferente preisnan di bibidanan alkohóliko i publiká komo indikashon pa preis di benta máksimo, pa asina komunidat por sa ta kua ta e preisnan ku por ser kobra den establesimentunan?

 

1. Minister ta konsiente ku pueblo di Kòrsou tin drechi di sosialisá nan mes i manera semper tabata un tradishon den nos pueblo ku tumando un bibida alkohóliko nos pueblo ta sinta i kombersá ku otro na un establesimentu. Na e momento aki esaki a wòrdu limitá pa e preisnan desproporshonal, kiko konkretamente Minister lo hasi pa nos pueblo paga un preis hustu?

 

Frakshon di MFK ta spera ku minister Mc. William tuma bon nota di e kontenido di e karta aki i kontestá nos preguntanan den e tempu stipulá konforme palabrashonnan entre Parlamento i Gobièrnu.  

 

Atentamente,

 

_____________________

Gilmar Pisas

Miembro di Parlamento

pa frakshon di MFK

 

 

Na: Presidente di Parlamento di Kòrsou

Señor W. Millerson

Wilhelminaplein # 4

PRESENTE

 

Kòrsou, 19 di yanüari 2020

 

Apresiabel Señor Millerson, 

 

Pa medio di e karta aki, hasiendo uso di artíkulo 96 di reglamentu di órden 

di Parlamento, mi ke pidi bo persona pa dirigí e karta athunto na Minister Giselle Mc. William enkargá ku Ekonomia i Turismo, ku preguntanan ku mi persona ta hasi na e minister konserní.

 

Danki pa e koperashon.

 

Atentamente,

 

______________________                 

Gilmar Pisas

Miembro di Parlamento

pa frakshon di MFK