Minister Maduro a brinda un reconocemento na sra. Rosalinda Luydens como iniciador di e carnaval di e parada di carnaval di Noord

Minister Maduro a brinda un reconocemento na sra. Rosalinda Luydens como iniciador di e carnaval di e parada di carnaval di Noord

 

Oranjestad – Recientemente Minister Maduro a brinda un reconocemento na sra. Rosalinda Luydens miho conoci como Tante Lilly cu ta e persona cu a inicia cu e carnaval den e pueblo di Noord.

Tante Lilly ta bini di un famia di 5 ruman y e ta conoci pa ta un persona humilde, trahado, cu hopi energia y cu un amor grandi pa mucha. E tabata un persona hopi activo den e bario di Noord. E tabata leidster den  e grupo di padvinderij Antilliaanse Meisjes Gilde y tabata traha na e speelschool Chikitin Bin Bin den Centro di Bario di Noord. Durante aña Tante Lilly a realisa hopi idea pa e speelschool. Na aña 2014 Speelschool Chikitin Bin Bin a traha un plenchi pa e muchanan hunga y a yama e  plenchi ‘Plenchi Tante Lilly’ como un muestra di aprecio y gratitud pa tur e trabounan cu Tante Lilly a haci pa e muchanan di barionan di Noord y bisindario. Tante Lilly ta tambe un persona masha religioso. E tabata forma parti di varios grupo di oracion di Noord. 

Tante Lilly ta e persona cu 55 aña pasa a haya e genial idea di cuminsa cu un parada di carnaval den bario di Noord. Un atardi Tante Lilly tabata para observa algun mucha ta hunga den cunucu ela haya e idea pa organisa un parada di carnaval den cunucu pa e muchanan. Tante Lilly a bisa nan, cu no mag bay cumpra paña di disfras, pero pa laga nan mes fantasia traha y asina haya un idea pa disfras. E muchanan tambe kier a saca nan Reina y Tante Lilly a hinca e nombernan den un wea grandi y riba sonido di fluit yen di gritamento a saca nan Reina.  Bisiñanan a fia Tante Lilly un garetia pa usa como carosa y hunto nan a gosa dornando e carosa cu trinitaria, cortina y sinta. Muchanan tabata asina contento y nan mes a bari plenchi y a trece nan stoel y banki pa bin disfruta di nan fiesta di carnaval. Tante Lilly mes a zorg pa Kool-Aid pa tur e muchanan por a haya algo di bebe. E dia di parada mes, e muchanan disfrasa na Turista, Chicas di Renny Otolina, trahe di Hawai, bendedo di briyechi, Pachi y Machi y trahenan di crepe di tur color, tabata tempran bou di e palo di kwihi na e cas di wela di Tante Lilly. E parada a cuminsa cu musica di radio, e muchanan mas grandi a toca tobo y bleki cu tabata zona manera steelband. E muchanan tabata canta y baila y a gosa masha hopi di nan parada cu a termina na cas di mayornan di Tante Lilly.

Asina aki e parada di carnaval di Noord a inicia, cu un parada den cunucu di Boegoeroei. Un idea di Tante Lilly pa organisa un parada den bario di Boegoeroei pa e muchanan diberti, sin e mes a realisa e tempo ey cu e tabatin un vision cu poco poco a keda crece y a subi caminda y te cu ela yega na e ruta cu tin awor. Tante Lilly su vision y dedicacion ta un contribucion valioso pa nos cultura. Su amor y pasion pa mucha a haci cu e muchanan a lanta ta balora nos cultura for di chikito.

E mandatario a yama Tante Lilly masha danki pa tur e añanan cu ela a dedica na organisa actividadnan pa e muchanan especialmente den bario di Noord y bisindario. Na nomber di Gobierno di Aruba, Minister di Cultura a reconoce Tante Lilly pa e bunita trabounan haci pa e muchanan y specialmente pa ta esun cu a inicia cu e bunita carnaval den e pueblo di di Noord. E dignatario a yama Tante Lilly danki pa su contribucion na cultura di Pais Aruba.