Fecha pa suministradó di servisio di trust, kompania di invershon, atministradó, agente di bolsa i atministradó di aktivo entregá nan kuentanan anual ouditá a keda aplasá

Fecha pa suministradó di servisio di trust, kompania di invershon, atministradó,
agente di bolsa i atministradó di aktivo entregá nan kuentanan anual ouditá a keda
aplasá

Willemstad/Philipsburg – Proveedó di servisio di trust, atministradó, kompania di invershon,
agente di bolsa i atministradó di aktivo ku ta bou di supervishon di Centrale Bank van Curaçao
en Sint Maarten (Banko Sentral) tin un obligashon di entregá na Banko Sentral nan kuenta
anual ouditá òf revisá pa un ouditor eksterno, huntu ku un karta di gerensia, promé ku dia
30 di aprel di kada aña. E obligashon akí ta konforme artíkulo 17 di Landsverordening toezicht
trustkantoren, artíkulo 8 i 17 di Landsverordening toezicht beleggingsinstellingen en administrateurs i
artíkulo 42 di Landsverordening toezicht effectenbemiddelaars en vermogensbeheerders.
Banko Sentral ta konsiente di e echo ku e medidanan di ‘lock-down’ ku e gobièrnunan di
Kòrsou i di Sint Maarten a apliká debí na e pandemia di COVID-19 a pone ku algun
instituto finansiero no ta den posishon pa kumpli ku e obligashon legal akí. P’esei, Banko
Sentral a disidí di duna e proveedónan di servisio di trust, atministradó, instituto di
invershon, agente di bolsa i atministradó di aktivo ku ta bou di supervishon di Banko Sentral
mas tempu pa entregá nan kuentanan anual ouditá òf revisá, te mas tardá dia 31 di yüli
2020.
Por fabor tene kuenta ku, no opstante, e atministradónan i proveedónan di servisio di trust
ta obligá di entregá e formulario “Reporting Form Number of Administered Investment Institutions” i
e formulario “Statistical Information Reporting Form Trust Service Providers” na Banko Sentral, mas
tardá dia 30 di aprel 2020.
Pa loke ta trata e institutonan ku nan tarifa di supervishon ta basá riba e total di aktivo,
Banko Sentral lo kalkulá e tarifa di supervishon pa aña 2020 usando e informashon mas
resien ku e tin na su disposishon.
Apesar di e situashon eksepshonal akí, ta spera di tur e institutonan supervisá ku nan lo sigui
kumpli ku nan obligashonnan legal i ku tur lei i regulashon aplikabel na nan.

Willemstad, 20 di aprel di 2020
CENTRALE BANK VAN CURAÇAO EN SINT MAARTEN

 

This site uses Akismet to reduce spam. Learn how your comment data is processed.

%d bloggers like this: