Selikor ta yegando tiki tiki na e skema di rekohé shushi normal

 

Ku hopi esfuerso i dedikashon personal di Selikor ta trahando oranan èkstra i poulatinamente ta yegando na e skema normal di rekohé shushi di kas. Den fin di siman ku a kaba di pasa tambe Selikor a traha ku dos skema pa remediá e retraso den e skema. Nos ta habri siman nobo ku retraso di 5 ruta di djabièrnè i tambe ku tur ruta di djarason. Riba djaluna lo eliminá e retraso di e 5 rutanan di djabièrnè i riba djaluna te ku djarason lo trata na rekohé tur retraso sobrá, inkluso di e siman akí.

Pa algun siman kaba Selikor ta eksperensiando sierto retraso den rekohementu di shushi di kas. E retrasonan akí a trese kuné ku no tur dia a rekohé e shushi riba e dia kustumbrá. Selikor ta hopi konsiente di e inkumbiniensanan ku e situashon akí ta trese kuné i ta hasiendo esfuerso inkansabel pa kumpli ku tur kas den tur bario. Sinembargo no tur ora esaki ta logra debí na e hecho ku ta poniendo un preshon enorme riba ékiponan disponibel pa hasi e trabou. 

Skarsedat di ekipo i kansansio serka e personal ta aun mas dominante den e situashon finansiero ku, meskos ku otro empresanan, Selikor tambe ta pasando aden. E preshon inmenso riba trahadónan tambe ta bini ku su desafionan.

Apesar di tur e retonan akí personal operashonal ta hasiendo esfuerso sobrehumano pa pronto por duna komunidat bèk e servisio ku nan a bin ta kustumbrá kuné riba e dia kustumbrá. Nos ta bolbe pidi komunidat pa karga poko mas ku nos. Pa kualke pregunta òf informashon, nos sentro di kliente ta disponibel na 434-1300.

This site uses Akismet to reduce spam. Learn how your comment data is processed.

%d bloggers like this: