Súplika pa laga víktimanan di aksidente den e posishon ku kontra nan.

 

KOMUNIKADO DI PRENSA 294 / 2020
2 ougùstùs 2020
Súplika pa laga víktimanan di aksidente den e posishon ku kontra nan.
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Den oranan di mainta di djasabra promé di ougùstùs 2020, polis i personal di ambulans a
keda dirigí pa Kaminda George Willems unda un siklista a kai for di su baiskel i aksidentá.
Na momentu ku e personal di ambulans a yega, el a konstatá ku e víktima tabata sufri di
hopi doló i esaki tabata pa motibu ku despues ku el a kai i tabata bentá riba kaya,
personanan den besindario a pone e víktima aki den un otro posishon, loke ku a hasi e
fraktura ku el a risibí, bira pió.
Nos tin komprenshon ku hopi bia, personanan ku yega promé na e sitio despues di un
aksidente, ke yuda e víktima, ku tur bon intenshon ku esakinan por tin.
Sea pa hal’e for di den solo òf for di riba kaminda pa evitá mas peliger den tráfiko ets.
Pero pa falta di konosementu spesialisá, e movementu di e víktima for di un sitio pa otro òf
simplemente bòltumentu di e persona, por sòru pa mas komplikashon ku tur konsekuensia
ku esei por tin.
Lo ta mas di apresiá ku komo bon siudadano, bo alertá e tráfiko serando e área, miéntras ta
spera yegada di polis pa sera e kaya i tuma eventual otro medidanan pa seguridat di e
persona(nan) enbolbí den e aksidente.
Meskos ta konta tambe pa personanan gravemente heridá, ku ta keda transportá den
vehíkulonan partikular pa hospital.
Aki tambe, kisas e eror ta wòrdu kometé dor di pensa ku transportando e persona den bo
mes outo, e ta haña e yudansa mas lihé.
Sin para ketu na órganonan vital di e víktima ku por keda afektá, dor di poné den un
posishon inkómodo den un vehíkulo ku no ta destiná pa transportá víktima.

This site uses Akismet to reduce spam. Learn how your comment data is processed.

error: Content is protected !!
%d bloggers like this: