Gabinete Rhuggenaath ku intenshon makabro pa pasa e lei di eksepshon (Uitzonderingstoestandwet) pa por kibra tur e poder demokrátiko

Gabinete Rhuggenaath ku intenshon makabro pa pasa e lei di eksepshon (Uitzonderingstoestandwet) pa por kibra tur e poder demokrátiko

 

Tur kos ta indiká ku Gabinete Rhuggenaath kier introdusí un lei diktatorial, ku nan a yama “Uitzonderingstoestandwet”, pa gabinete Rhuggenaath por tin den nan man e poder pa hasi i deshasí i trapa riba nos demokrasia, ta fresku den nos memoria ku na aña 2011 ora tabatin un kalamidat kousa dor di e rabu di orkan Thomas, ku Gabinete Schotte no tabatin mester di un “Uitzonderingstoestandwet” pa dekretá estado di emergensia.

 

A usa e lei ku Gezaghebber di teritorio Insular tabatin na su disposishon i resientemente ora ku COVID-19 a dal aden na Kòrsou Gabinete Rhuggenaath a usa e lei di karentena i otro leinan pa a anunsiá un “Lock Down”, pa asina tene e pueblo den toke de keda tur anochi. 

 

Pues ta mas ku kla ku e proposishon di lei aki, tin ku drenta na vigor pa e kantidat di medidanan ku lo bai pasa kontra di pueblo di Kòrsou, esaki debí ku gabinete Rhuggenaath sa ku pueblo lo lanta kontra di e medidanan aki. E lei aki su úniko meta ta pa oprimí pueblo di Kòrsou. No ta un sorpresa ku kier uza e lei aki pa para Elekshon di 19 di mart próksimo, teniendo na kuenta ku pueblo no kier mira PAR i MAN mas den gobernashon.

 

MFK ya pa hopi luna a bin ta atvertí komunidat pa medio di medionan di komunikashon riba e peliger di proposishon di lei diktatorial aki. Hasta den reunion di komishon sentral di Parlamento riba 30 di sèptèmber nos Frakshon a splika den detaye tur e peligernan ku nos a deskubrí den e lei aki, manera entre otro;

 

• Un ámtenar apuntá dor di minister por drenta bo kas sin mester di outorisashon (Last) ni identifikashon;
• Un ámtenar apuntá dor di Minister por pidi bo informashon i bo ta obligá di dun’e e informashon i koperá ku e supuesto investigashon aki;
• Un ámtenar apuntá dor di minister por kue bo telefòn, kòmpiuter, I-Pad etc, den beslag i revisá nan kontenido sin ku nada por bin afó;
• Gabinete Rhuggenaath por hasta kue bo kas òf kualkier propiedat di bo (roerend i/òf onroend) den beslag i bira doño di esaki i duna bo un kompensashon, sin ku bo por habri bo boka bisa nèt nèt nada;
• Gabinete Rhuggenaath por prohibí kualkier manifestashonnan, hasta sindikatonan lo por ser poné un banda;
• Gabinete Rhuggenaath por ruimop sierto sitionan i hiba e personanan na un lugá temporal (manera un na kampo di Wakawa) sin ku bo por bringa e desishon aki;
• Gabinete Rhuggenaath por disidí ku ta stòp tur tipo di tráfiko na sierto sitio na Kòrsou;
• Bo por ser prohibí di di ekspresá bo pensamentu i sintimentunan òf di risibí pensamentunan di otro hende esaki den ningun forma, ni den forma di un pelíkula;
• Gabinete Rhuggenaath por prohibí transmishonnan via medionan di komunikashon manera radio, televishon, Internet i Facebook;

 

• Tambe gabinete Rhuggenaath por pidi/eksihí tur informashon ku un medio di komunikashon ta disponé di dje;

 

Esaki ta djis algun derechi di e siudadano di Kòrsou, ku lo ser trapá ku e proposishon di lei aki, si esaki drenta na vigor.

 

Nos di MFK ta sumamente preokupá ku e desaroyo aki i nos ta kontentu ku siudadanonan mes a lanta kontra di e proposishon di lei aki. Ta bon pa menshoná ku segun nos análisis e lei aki no ta kuadra i ta kumpli un konsepto moderno, na Hulanda por ehèmpel tin un lei pa kada “nood” òf “uitzondering”, ta p’esei na Hulanda no ta papia di un “NOOD WET” i/òf “UITZONDERINGSWET”.

 

Na nos pareser a kue un lei ku ta konta pa ora tin un guera i aplik’é pa tur sorto di situashon di emergensia ku por surgi na Kòrsou, esaki ta un fout hopi grandi di parti di Gabinete Rhuggenaath.

 

MFK lo VOTA KONTRA di e lei aki di Estado di Eksepshon aki, nos lo sugirí pa laga huristanan bin ku leinan di emergensia pa kada un posibel emergensia ku por surgi. Pa asina restringí e trapamentu di e derechi di e siudadano. Si e emergensia ta Pademia, dikon mester drenta mi kas i kue mi kòmpiuter òf telefòn bai kuné?

 

Dikon bo por kue hasta mi kas i mi propiedatnan den beslag?

 

Si ta un guera tin ku ta menasa di trese intrankilidat na Kòrsou, MFK por komprondé sierto di e proposishonnan den e lei aki, pero e forma general ku e lei aki ta hinka den otro ta inakseptabel.

 

MFK ta komprometé su mes ku pueblo di Kòrsou, ku si e 11 nan ku ta sostené gobiernu aki aprobá e lei aki, ora e MFK drenta gobiernu despues di 19 di mart próksimo, lo nos laga eliminá e lei aki mesora.

 

Charles Cooper

Parlamentario pa frakshon di MFK