Prome Minister Evelyn Wever-Croes: TASKFORCE A INDICA UN MEHORACION ENORME DEN COMPORTACION DI ESTABLECIMENTO Y CLIENTE

 

Prome Minister Evelyn Wever-Croes:

 

TASKFORCE A INDICA UN MEHORACION ENORME DEN COMPORTACION DI ESTABLECIMENTO Y CLIENTE

 

Dialuna mainta durante conferencia di prensa di Gobierno di Aruba, Prome Minister Evelyn Wever-Croes, Minister Dangui Oduber, ATA y DVG a duna informacionnan concreto tocante ultimo desaroyonan di Covid na Aruba. 

 

Prome Minister a duna di conoce cu e Taskforce a indica un mehoracion enorme especialmente na establicimentonan cu a adapta nan mes na e reglanan pero tambe cu comportacion di clientenan. A nota tambe cu establecimentonan ta acerca Taskforce pa puntra kico por y kico no por y Taskforce ta bay na e establecimentonan pa wak y duna aprobacion. 

 

Tambe por a constata cu clientenan mes ta coregi y of conscientisa otro. Si en caso un cliente drenta sin tapaboca, un otro ta hala su atencion y esaki ta loke nos mester haci. Cada ciudadano mester sa kico su responsabilidad ta. 

 

Den e temporada bunita aki Gobierno di Aruba hunto cu Crisis Team ta permiti espacio pero na mes momento ta recorda tur ciudadano pa tene cuenta cu tin mas frecuencia di salimento, mas evento social na unda ta bay tin contacto cu mas hende cual ta haci e situacion di riesgo mas grandi. 

 

“Den e flexibilisacion aki, nos ta confia cu cada ciudadano lo sa di cuida su mes y su famia y di sigui aplica e regla cu ta vigente. P’esey mi ta urgi pa sigui e medidanan di higiene mas frecuente cu prome. Laba man mas hopi cu ta posibel, ora no por uza handsanitizer. Ora bo drenta tienda of establecimento uza handsanitizer tambe. Uza tapaboca na tur establecimento paden pero pafo tambe por ehempel ora di haci compras den caya Betico Croes na unda tin hopi bon deal y na unda tin hopi mas hende. Tene distancia tambe si bo tin bishita na cas. Principalmente si bo tin sintoma, keda paden, yama bo dokter di cas y e lo guia bo. 

 

Mi no ta cansa di ripiti: NO ta e pais di mas rico y mas poderoso ta vence e virus aki sino e pais mas disciplina. Nos a demostra cu nos por, nos ta dominando e di dos ola, ban sigui cu e mesun reglanan di disciplina, ban keda mes cauteloso pa asina nos por evita un di 3 ola mientras nos ta haña un vacuna”, Prome Minister a termina bisando.

This site uses Akismet to reduce spam. Learn how your comment data is processed.

error: Content is protected !!
%d bloggers like this: