Direktor di RdK, ta mancha e proseso pa yega na un operador pa Refineria dor di alarga 3 biaha e tempu pa sera e proseso di entrega di oferta pa benefisiá un kompania di India

 

 

 

Direktor di RdK, ta mancha e proseso pa yega na un operador pa Refineria

dor di alarga 3 biaha e tempu pa sera e proseso di entrega di oferta

pa benefisiá un kompania di India

 

Definitivamente e direktor interino di Refineria di Kòrsou (RdK) no ta trata e proseso pa yega na un operador pa nos refineria di un forma transparente i serio. Den e proseso anterior kaminda e mesun direktor aki huntu ku tim a gasta mas di mas o ménos 30 mion florin pa buska un operador i proseso a kaba na Aros ku Koko i refineria a sera tòg.

 

Den e proseso anterior, di un forma sutil e direktor interino aki a hasi tur loke tabata na su alkanse pa trese un broker pa manehá refineria. For di promé ku a firma ku e broker aki ku ta Grupo Klesch, frakshon di MFK a alerta tantu gobiernu komo e direktor interino ku e akuerdo aki na promé lugá ta hipotekando nos propiedat i ku grupo Klesch no ta dispone di kapital pa ehekutá e proyekto aki.

 

Pero no tin mas surdu ku esun ku no kier tende i mas siegu ku esun ku no kier mira, awe nos no tin ku ripití un biaha mas kon e romanse entre RdK i Klesch a terminá i kuantu mama i tata di famia a pèrdè trabou i kuantu entrada na entre otro belasting Kòrsou a pèrdè for di dia ku refineria a sera.

 

Suskrito a wòrdu pone na altura ku den e trayekto aktual tambe e direktor interino ta bolbe hasi maniobranan straño pa trata na akomodá un kompania for di India pa tuma maneho di Refineria. A alarga e periodo pa entrega di e asina yama “Non Binding Proposal”, tres biaha i sin aprobashon di esnan ku si a entrega un oferta na tempu, pa asina e kompania Indio por entrega su oferta tòg. Esaki debí ku den e promé ròndu e kompania di India no a mustra interes i te hasta nan no a bin bishita e instalashon di refineria pa asina por nan oferta konforme e eksigensianan.

 

Frakshon di MFK no ta komprondé di kon tin ku sera porta pa nos mes hendenan, invershonistanan lokal ku tin sufisiente kapital i ku a hasi un oferta i ta kla pa manehá e refineria, pero ta opta pa duna un kompania ekstranhero e operashon di nos refineria. Pena La Bida, ku ta intenshon di e direktor interino di RdK pa duna un kompania ekstranhero e mesun dil ku a duna grupo Klesch i tene nos invershonistanan lokal afó. Te hasta sindikatonan ta di akuerdo pa laga nos invershonistanan manehá refineria.

 

Mi kier djis kòrda Marcelino “Chonky” de Lannoy, ku denter di 3 luna tin kambio di guardia na Fort Amsterdam, esnan ku tei awor aki ku bo ta sirbiendo ta bai kas i abo so lo keda pa karga ku tur loke a ser hasi robes den e proseso pa buska un operador pa nos refineria. Nos ta spera di kurason ku señor de Lannoy no ta hinkando su kurpa den problema pa sirbi esnan sinta den Fort Amsterdam.

 

Pa nos di MFK, nos mes invershonistanan na promé lugá, ta p’esei “Nos Kurason ta Bati pa Kòrsou”.

 

Gilmar “Pik” Pisas

Lider di Frakshon pa MFK