Haitham Metry di Partido Democraat: ta kontentu di tende ku e asosiashón di hotèlnan, CHATA, mes ta buskando manera kon pa re-aktivá nos turismo bèk .
Haitham Metry di Partido Democraat: ta kontentu di tende ku e asosiashón di hotèlnan, CHATA, mes ta buskando manera kon pa re-aktivá nos turismo bèk .
COVID-19 a sòru pa un paro abrupto den e sektor di turismo rònt mundu pa ya kasi un aña, i tresiendo ku né un debilitashon enorme den e ekonomía di praktikamente tur país.
Serka nos esaki no ta un eksepshón.
Turismo ta un pilá super importante pa kualke isla i hasta pa paísnan mas grandi.
Tur bishitante mester di un kaminda pa keda, sea ta den un hotel luhoso, un hotel menos luhoso, un apartamento, un kas òf un kamber serka un persona lokal. Banda di esaki e bishitante mester kome tres bia pa día sea den un restaurant, un merkado, un truck di pan òf hasiendo kompras den supermerkado/toko pa e prepará su mes kuminda kaminda ku e ta kedando.
E bishitante mester di transporte tambe manera hür un òuto, hasi uso di servisio di taxi òf transporte públiko.
Klaru ku e bishitante ke dibertí tambe i e ta bishitá e diferente luganan ku ta ofresé varios aktividat, paseo, obra di arte, experenshia úniko manera nos mundu bòu di awa.
Tur e establesimentunan enkargá ku e ariba menshoná tin un òf mas hende ku nan ta empleá aparte di e otro negoshinan ku nan ta traha kuné ku tambe ta empleá mas hende ku no nesesariamente ta bin den kontakto ku un turista.
Sr. Haitham Metry di Partido Democraat ta kontentu ku nos ta parti di un reino riku, pero di otro banda e ta lamentá ku nos gobernantenan no ta hasiendo sufisiente esfuerso pa traha mas serka ku e partner mas grandi den reino kual ta Hulanda pa asina logra mas benefisio for di esaki manera un fluho di tráfiko di bishitante konstante i kresiente den nos direkshón.
E promé tres lunanan di aña ta e temporada krusial pa e sektor di turismo i tur e empresanan ku ta traha ku e sektor aki, mirando ku esakinan ta e lunanan kual ta hasi friu na Hulanda i mayoría Hulandes ta buska solo.
Nos turismo ta pèrdiendo un oportunidat di oro mirando ku ta hasiendo hopi friu na Hulanda e díanan aki i e Hulandesnan no tin otro kaminda pa bai pa e solo, i ta awor nos isla lo por a haña e empuhe ekonómiko tan nesesario pa nos por kumisá lanta bèk.
Euro tambe tin un balor haltu na e momentunan aki kual ta hasi nos isla finansieramente ahún mas atraktivo pa e Hulandesnan.
E kantidato number 6 riba lista di Partido Democraat ta haña hasta bergonsoso ku ta e mesún sektor privá ku gobièrnu kada bes ta pinta komo e mal hende i traha en kontra di djé ta netamente esún ku ta kla pa tuma e promé paso pa yuda konvensé Hulanda pa deklará nos isla un destinashon ku kódigo hel pa asina por rebibá nos turismo i salba e miles di kuponan di trabòu di nos hendenan ku ta traha direktamente i inderektamente den e sektor aki na lugá di hinka nos dushi país den debenan fiando mas i mas plaka serka Hulanda.
Señor Metry ta kontentu ku e inishiativa di e asosiashonnan di hotèlnan i restaurantnan, i ta aplòudínan i e ta spera ku pronto nos por kumisá mira e turistanan Hulandes Europeo di bishita serka nos di nobo.
Haitham Metry tòg lo ké ekurashá nos gobièrnu pa mientras tantu limpia nos kayanan i nos playanan públiko pa asina motivá nos mes hendenan i pa nos isla ta limpi i bunita pa ora e turistanan kumisá bini aki atrobé.
