Partido Democraat a hasi un bishita na Ofisina di Turismo (CTB)

Partido Democraat a hasi un bishita na Ofisina di Turismo (CTB)

 

E “Masterplan” di turismo 2016-2020 mester wòrdu ehekutá mas pronto ku ta posibel, teniendo kuenta ku protokòlnan di Covid-19.

 

Na komienso di e siman aki, Partido Democraat enkabesá pa Elsa Rozendal a hasi un bishita di kortesia na Ofisina di Turismo (CTB), na unda Direktor General sr. Paul Pennicook huntu ku e tim di CTB a risibí sra. Rozendal ku un kaluroso Bon Biní.
Kandidatonan riba lista di Partido Democraat sra. Jeanette Bonet, sr. Jonathan Jonckheer i sra. Esmeralda Pinto Soares a kompañá Elsa Rozendal durante su bishita.

 

Partido Democraat a haña un presentashon di e sifranan di turismo di añnan 2019 i 2020. No ta un sekreto ku nos turismo tabata mustra un liña asendente te ku 2019 promé ku Covid-19 a kue mundu den su gara. E merkado mas grandi di nos turismo ta bini for di Oropa, espesialmente e merkado Hulandes kaminda pa basta tempu kaba tin un konseho negativo di gobièrnu Hulandes pa hasi biahenan ku no ta nesesario. E impakto negativo pa motibu di Covid-19 ta tur bisto ku por tin ora bo mira e sifranan di aña 2020.

Ainda no ta lat pa “pick up” e turismo for di Oropa pa nos logra un mihó aña ku 2020. Sr. Pennicook a duna di konosé ku CTB huntu ku su partnernan stratégiko ta trahando dia i anochi pa bin ku un proposishon pa Hulanda hasi Kòrsou un pais ku kódigo hel (Code Yellow). Nos kasonan di Covid-19 ta sumamente abou; pa mas ku 6 siman kaba ménos ku 5 hende ku Covid-19 ta den hospital pareu i nos regla i protokòlnan relashoná ku Covid-19 ta kuadra ku esun di WHO. Pues nos tin tur e ingredientenan pa bai kuminsá risibí turistanan atrobe for di Hulanda. Ya kaba Alemania a pone Kòrsou bèk na e kódigo hel.

Pa loke ta trata e turismo di krusero, esaki tambe ta un problema mundial i lo premirá ku esaki lo kuminsá krese bèk te na aña 2023. Dependé kon lihé mundu kompleto lo wòrdu bakuná e “jump start” di e turismo di krusero lo por haña bida bèk mas promé ku 2023.

 

Di parti di Partido Democraat sra. Elsa Rozendal a trese tres punto dilanti ku lo kontribuí positivamente na desaroyo di nos turismo;

  • E “Masterplan” di turismo 2016-2020 mester wòrdu ehekutá mas pronto ku ta posibel, teniendo kuenta ku protokòlnan di Covid-19.

  • Mester kuminsá konkretisá plannan ku Partido Democraat a diskutí siman pasá ku gerensia di CPA relashoná ku hafnan pa yatenan grandi i luhoso. Partido Democraat ta para pa un aserkamentu diferente. Diferente islanan den Karibe ku tin asta ménos pa ofresé ku nos tin e tipo di hafnan aki. Nos tambe por, ta e “political will” mester tei!

  • Mester krea un infrastruktura pa mihó mobilidat entre e áreanan Jan Thiel, Bapor Kibrá, Marie Pampoen, Pietermaai, Punda, Otrobanda, Zakito i Piscadera.

This site uses Akismet to reduce spam. Learn how your comment data is processed.

error: Content is protected !!
%d bloggers like this: