Prome Minister Evelyn Wever-Croes PREMIER WEVER-CROES A REUNI CU EMBAHADA DI REINO NA COLOMBIA Colombia ta un partner hopi importante pa Aruba
Prome Minister Evelyn Wever-Croes
PREMIER WEVER-CROES A REUNI CU EMBAHADA DI REINO NA COLOMBIA
Colombia ta un partner hopi importante pa Aruba
Dialuna e siman aki Premier Evelyn Wever-Croes a ricibi bishita di embahada di Reino na Bogota Colombia, sr. Ernst Noorman. E ta su prome bishita na Aruba y durante di e reunion a toca temanan di interes general pa Aruba y Colombia. Embahada di Reino Hulandes na Colombia ta representa tambe interesnan di Aruba y interesnan cu nos kier sirbi pa Colombia.
Durante di e reunion a toca e temanan di mas importante y e prome tabata turismo y conectividad a traves di Avianca. Esaki ta keda algo hopi importante mirando cu turismo lo sigui ta nos pilar economico mas principal. Tambe a toca e tema di cuido medico pasobra Aruba ta haci hopi uzo di servicio medico di Colombia y den esaki e embahada ta hungo un rol hopi importante. A toca tema tambe di lasonan comercial y con pa promove esaki pa por atrae inversionistanan di Colombia pa inverti na Aruba. Pa cumpra nos productonan y asina yuda nos pa reactiva nos economia.
Banda di esaki a papia riba e tema di importacion di carni, considerando e interes di Aruba pa esaki. Carni di bon calidad y mas barata compara cu locual ta importando awo. Otro dos tema cu a trata cu e embahador, ta innovacion y cultura. Aña pasa durante un bishita di Prome Minister na Colombia cerca e Presidente di Colombia sr. Duque, tambe a trata e diferente temanan aki. “E relacion entre Aruba y Colombia ta un bon relacion y kier mantene asina”.
Na juni di e aña aki probablemente lo bay tin un bishita di estado di cual Presidente Duque ta bay bishita Rey Willem Alexander y Reina Maxima na Hulanda y Minister President nan di Aruba y Corsou tambe ta invita pa participa.
“Ta depende di COVID e momento ey, pero esaki ta ilustra e importancia di relacion cu tin entre Reino y Colombia y den esaki Aruba ta considera Colombia un di e partnernan di mas importante. Pa resumi mester bisa cu e tabata un bon reunion y a traves di embahada di Reino na Bogota lo haci tur posibel pa logra reactiva Aruba su economia”, Prome Minister Evelyn Wever-Croes a duna di conoce.
