Jeanette Bonet #2 riba lista di Partido Democraat Uni forsa pa logra garantisá eksistensia di nos refineria

 

Jeanette Bonet #2 riba lista di Partido Democraat

Uni forsa pa logra garantisá eksistensia di nos refineria

 

Febrüari a kaba te nos a kuminsá mart i ainda no tin klaridat riba futuro di nos refineria. Jeanette Bonet komo mama, esposa, empresario i #2 riba lista di Partido Democraat ta uni su sentimentunan na tur e famianan ku ta pendiente di e negosiashonnan pa futuro di e refineria. Tur apoyo, sosten moral i orashon na e gran kantidat di famianan ku ta bibando momentunan di tenshon pa hopi luna kaba. 

Refineria na Korsou ta un industria ku a kai bastante, sinembargo te ainda hopi famia ta mira ku plaser e bon tempunan ku nan a biba danki na eksistensia di e refineria. E refineria no solamente a brinda un bon entrada pa kada famia pero tambe a pèrkurá pa stabilidat i un struktura di edukashon. Asta esnan ku via di un kontratista ta subi tereno di Isla i COT na Bullenbaai, tur ta den mesun insertidumbre. E situashon aki no ta sano pa niun ser humano, Jeanette Bonet ta apuntá.

Anto no papia mes di e echo ku awor aki nos preis di gasolin a subi drástikamente atrobe, anto esaki ta debí ku mester kubri gastunan adishonal pa kompanianan di gobièrnu, pasobra e refineria lokal no ta den operashon. Nos komunidat ta pagando hopi mas na preis di gasolin i otro kombustibel loke ta bai reflehá su mes den tur otro preisnan ku ya kaba ta bastante haltu. 

Jeanette Bonet ta kere ku pa awor aki mester hasi lo maksimo pa logra un akuerdo ku un kompania pa operá i manehá e refineria. Naturalmente esnan ku ta negoshá mester pèrkurá pa mara e operashon na normanan ku ta kumpli ku medio ambiente loke ta bon pa e trahadónan i hinter Kòrsou. Una bes ta negoshá un kontrakt nobo mester garantisa ku ta sigui invertí den inovashon pa e proseso di refinashon por tuma lugá mas limpi.

E #2 riba lista di Partido Democraat ta masha kontentu di mira ku sindikatonan den sektor petrolero a tuma un ròl hopi importante pa loke ta trata kontinuashon di e refineria. Di e forma ei e sindikatonan a demostrá nan kompromiso serio ku futuro di e trahadónan ku ta nan miembronan.

Desaroyonan mundial ta mustra ku refinerianan manera nos konosé nan awor aki, probablemente lo no eksistí mas dentro di algun dékada. Echo ta ku di awor aki te e momentu ei Kòrsou mester pèrkurá pa saka tur probecho posibel for di nos refineria. Ademas e ta un pilá ekonómiko fuerte ku na momentu ku e ta den operashon ta sòru pa bon entrada pa su trahadónan. Covid a dal ekonomia mundial duru, ménos turista ménos avion ménos barku ménos fabrikashon. Manera poko poko e ekonomia rekuperá e demanda pa energia lo subi. Energia alternativo no por kubri ora ekonomia mundial lanta kabes. Esaki ta buta ku nos refineria tin un bon 20 pa 30 aña di eksistensia sin problema.

Jeanette Bonet ta brinda su apoyo moral total na tur famia di refineria Isla ku ta bibando den insertidumbre. Partido Democraat lo hasi tur esfuerso pa kuida e kuponan di trabou aki ku ta asina vital den e sektor ei. Miéntras Partido Democraat ta sigui yuda pa desaroyá otro pilánan ekonómiko ku por remplasá refineria den futuro ku funshonnan mes òf asta mas balioso ku ta generá mes òf mas tantu entrada pa nos hendenan. Konta ku Jeanette Bonet den esaki. 

 

Covid a dal ekonomia mundial duru, ménos turista ménos avion ménos barku ménos fabrikashon. Manera poko poko e ekonomia rekuperá e demanda pa energia lo subi. Energia alternativo no por kubri ora ekonomia mundial lanta kabes. Esaki ta buta ku nos refineria tin un bon 20 pa 30 aña di eksistensia sin problema.