ALUMNONAN DI LEERORKEST DI MARIA AUXILIADORA TA TERMINÁ AÑA ESKOLAR DEN RITMO

ALUMNONAN DI LEERORKEST DI MARIA AUXILIADORA TA TERMINÁ AÑA ESKOLAR DEN RITMO

 

Willemstad – Alrededor di 80 alumno di grupo 6, 7 i 8  di Kolegio Maria Auxiliadora, ku ta haña lès di muzik, kanto i rap i ta siña toka mas ku 12 tipo di instrumènt serka Leerorkest Kòrsou, a presentá algun kansion i rap p’asina sera aña eskolar 2020/2021 den ritmo. Pa e okashon aki 5 alumno di Mgr. Niewindt College, ku tambe ta haña lès serka Leerorkest i 2 alumno di Dennis Aalse Youth Orkestra a kompañá e koro. Apesar ku Covid-19 a limitá e lès i trainingnan pa algun luna e alumnonan a logra e meta di demostrá nan talento musikal, disiplina i motivashon logrando sintimentunan di orguyo i satisfakshon serka presentenan. 

 

4 aña pasá Kòrsou a inisiá ku e proyekto Leerorkest aki na Kòrsou i ta duna alrededor di 120 alumno di Kolegio Maria Auxiliadora i 80 alumno di Mgr. Niewindt College lès di muzik. Leerorkest ta konta riba kolaborashon, konosementu musikal i dedikashon di 6 dosente. Dennis Aalse, dosente di 5 diferente instrumènt di bientu (tròmpèt, trombon, korneta (hoorn), klarinèt i dwarsflùit) i dirigènt di e orkesta sinfóniko hubenil, Anna Aalse, dosente di kanto i dirigènt di koro, Axel Prudencia, dosente di diferente instrumènt di perkushon, Genaro Gonzalez Reyes, dosente di fio i alt fio, Rensley Pinedo, dosente di kontrabas i cello i Shanuska Schoop, dosente di rap. Ademas di e dosentenan di Leerorkest e hóben músiko Djulvadrick Groenenberg a reforsá e orkesta. 

 

Pa e okashon aki a hiba palabra kolaboradó di Leerorkest Bianca Neman ku a splika e meta i kontenido di Leerorkest, direktor di Maria Auxiliadora Giana Murray-Anasagasti ku a gradisí tur ku ta kontribuí na e proyekto i su tim di personal ku semper ta pará kla pa kolaborá i Roy Kross presidente di Leerorkest ku a klousura e evento ku palabranan di motivashon pa e hóbennan sigui ku nan karera musikal pa e.o. evitá ku den futuro mester sigui invitá músikonan djafó pa kompañá artistanan internashonal. 

 

Representantenan di Direktiva di Skolnan Katóliko, Ministerio di Enseñansa, Kultura i Deporte, Samenwerkende fondsen, Fundashon Konstruí Awe i Mañan, Curaçao Cares/Cura Doet, Kiwanis, direktor i dosentenan di  Maria Auxiliadora i tambe miembronan di direktiva di Stichting Leerorkest Curaçao a disfrutá di un tremendo presentashon. Embahador di Leerorkest i kantante internashonal Yu di Kòrsou Tania Kross, ku a inisiáku e proyekto Leerorkest na e skol ku el a bai na mucha, tabata sumamente orguyoso di mira prestashon di e orkesta sinfóniko hubenil aki i e grupo di rap i e trabou balioso ku e dosentenan ta hasi pa logra mas muzik na skol.

 

Kontinuidat di e lèsnan di Leerorkest te awor tabata posibel danki na fondonan ku e.o. Leerorkest Hulanda, Ministerio di Hustisia di Hulanda i Samenwerkende fondsen a pone disponibel i donashonnan di e.o. Kiwanis i fondonan privá ku a risibí. Leerorkest ta spera di por haña e fondonan nesesario pa garantisá kontinuashon di e proyekto. Leerorkest tin balor agregá i ta kontribuí na desaroyo personal i musikal di su alumnonan. 

 

Potrèt: 

1.Bista di e orkesta sinfóniko hubenil di Kolegio Maria Auxiliadora kompañá pa e.o.dosentenan di Leerorkest i 5 alumno di Mgr. Niewindt College (bistí na polo bèrdè) den preparashon pa inisiá ku e presentashon. 

  1. Alumnonan ta toka tròmpèt, perkushon, fio, kontrabas, trombon i presentashon di koro i grupo di rap.
  2. Direktiva i algun invitadonan spesial

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: