CBCS, den position paper publiká riba dolarisashon: No tin argumento konvinsente, riesgonan signifikante

CBCS, den position paper publiká riba dolarisashon:
No tin argumento konvinsente, riesgonan signifikante

WILLEMSTAD/PHILIPSBURG – Atraves di añanan, ku regularidat e régimen di tasa di kambio
ku ta na vigor den e union monetario di Kòrsou i Sint Maarten a bira tópiko di diskushon, i e
Landspakketnan pa Kòrsou i Sint Maarten a bolbe lanta interes den e tema. Entre otro, e paketenan
akí ta stipulá ku mester laga un partido independiente hasi un análisis di kiko ta e kosto ku
komunidat tin ku karga pa por tin un moneda propio, versus dolarisashon. Por haña resultado di
e análisis ei den e Staff Report di IMF su Konsulta a Base di Artíkulo IV ku Kòrsou i Sint Maarten
pa 2021. En bista di e interes aktual den e tópiko di dolarisashon, Centrale Bank van Curaçao en
Sint Maarten (CBCS) a publiká un position paper ku un análisis a fondo di e benefisio- i kostonan ku
adopshon di dòler estadounidense komo moneda ofisial, esta, dolarisashon, lo trese kuné.
Partikularmente na Sint Maarten, dolarisashon ta keda menshoná frekuentemente komo un
alternativa pa e sistema aktual ya ku, riba e isla ei, dòler estadounidense ta ampliamente den
sirkulashon i ta de fakto un forma di pago aseptá pa produkto i servisio.
CBCS su dokumento di posishon ta duna un bista amplio di vários sistema di tasa di kambio. E ta
splika e diferensianan entre e sistema di tasa di kambio fiho konvenshonal, esta, mara bo moneda
na un otro, manera ta e kaso aktualmente den e union monetario di Kòrsou i Sint Maarten, e
sistema di tasa di kambio fleksibel, i dolarisashon kompleto, kaminda un pais ta adoptá dòler
estadounidense komo moneda legal. Tambe, e dokumento ta duna ehèmpel detayá di algun pais
ku a dolarisá, loke a hiba nan na tal desishon i ki bentaha- i desbentahanan dolarisashon a trese
kuné pa nan.
Esensialmente, un tasa di kambio ta e relashon entre preis di un moneda i preis di un otro moneda
òf grupo di moneda. Tasa di kambio ta un faktor ku tin un influensia importante riba aktividat
ekonómiko, inflashon i balansa di pago. P’esei mes, e régimen di tasa di kambio ku un pais skohe
i e manera ku ta manehá e régimen ei ta esensial pa salvaguardá e pais su kompetitividat, stabilidat
makroekonómiko i kresementu. Paisnan ku ekonomia chikitu i habrí generalmente ta skohe pa e
sistema di tasa di kambio fiho konvenshonal. E echo ku a mara e moneda di Kòrsou i Sint Maarten
na dòler estadounidense ta lógiko en bista di e relashon komersial fuerte entre e ekonomianan akí
i Estádos Unídos, prinsipalmente den e kaso di Sint Maarten. Ademas, na tur dos pais, mayor parti
di e transakshonnan internashonal ta na dòler estadounidense. Pa un pais ku tin e régimen di tasa
di kambio fiho konvenshonal por manehá su komèrsio ku eksterior, su banko sentral mester
mantené sufisiente reserva di moneda estranhero, manera dòler estadounidense, pa por garantisá,
entre otro, ku pago internashonal por sosodé sin problema. Pa loke ta trata nos union monetario,
e norma generalmente aseptá ta ku e reserva mester ta sufisiente pa por kubri un mínimo di tres
luna di importashon.
Florin di Antia Hulandes (NAf.) ta mará eksitosamente na dòler estadounidense for di 1971, na
NAf. 1.79 pa kada dòler. Esei no a kambia na momento di desmantelashon di Antia Hulandes na
2010 i ketu bai e tasa di kambio fiho konvenshonal akí di florin i dòler ta e régimen ku ta na vigor
na e union monetario di Kòrsou i Sint Maarten. E paridat òf vínkulo entre florin i dòler ta sólido
tambe; un evidensia di esei ta e kobertura di importashon (esta, e proporshon entre e union
monetario su importashon total di produkto i servisio i su kantidat di reserva ofisial, ku eksepshon
di reserva di oro), ku te ainda ta kómodamente mas haltu ku e norma di tres luna.
E paisnan ku ta opta pa dolarisá ta sea mikroestado òf pais ku a pasa den difikultat ekonómiko
grave. Tin literatura amplio riba e benefisio- i kostonan di dolarisashon. Un di e benefisionan
prinsipal di dolarisashon ta ku e ta eliminá e riesgo di ahuste di e tasa di kambio, konosí tambe
komo riesgo di tasa di kambio òf ‘valutarisico’. Eliminashon di e riesgo akí ta resultá den tasa di
interes mas abou i mas stabilidat den moveshon internashonal di kapital, loke por stimulá
invershon i kresementu ekonómiko. Otro benefisio ta un redukshon di kosto di transakshon den
komèrsio i fluho di kapital, ya ku no mester konvertí e moneda nashonal mas den e moneda ku e
ta mará n’e (konosí komo e ‘moneda di referensia’). Fuera di esei, dolarisashon por kondusí na
stabilisashon di preis, ya ku inflashon tin e tendensia di desaroyá den direkshon di e tasa di
inflashon ku tin na e pais di e moneda di referensia. Por último, dolarisashon ta fomentá disiplina
fiskal, ya ku e ta limitá e posibilidat di finansiamentu monetario, esta, emishon di mas plaka, pa
kubri défisit fiskal.
Un di e desbentahanan prinsipal di dolarisashon ta ku e outoridat monetario ta pèrdè
kompletamente e posibilidat di hiba su propio maneho monetario i di tasa di kambio. Pa por
apsorbé shòk eksterno, un ekonomia dolarisá mester rekurí na ahuste di suèldu nominal i di sierto
preis. Un otro kosto di dolarisashon ta ku e outoridat monetario ta pèrdè e entrada di señoriahe,
esta, e ganashi ku e ta optené mediante su derecho di emití plaka.
1 Por último, e outoridat
monetario ta pèrdè su ròl komo finansiadó di último rekurso2 (lender of last resort) pa banko den
difikultat.
Den kaso di e union monetario di Kòrsou i Sint Maarten, no ta probabel ku dolarisashon lo resultá
den benefisio ekonómiko supstansial. Na mes momento, e kostonan i spesialmente e riesgonan ku
un kambio asina lo trese kuné sí ta real. Mirando ku nos moneda tin 50 aña kaba mará na dòler na
un manera kredibel, e benefisio di eliminá tasa di kambio ta limitá. Inflashon ta relativamente abou
i stabil kaba, i su tendensia ta di move pareu ku inflashon na Estádos Unídos. Ademas, dolarisashon
lo no afektá e responsabilidat di gobièrnu di e dos paisnan pa kumpli ku e reglanan presupuestario
estrikto fihá den Rijkswet financieel toezicht Curacao en Sint Maarten. Di otro banda, e echo ku
1 E ganashi akí ta ser generá a base di e diferensia entre e balor nominal i e kosto di produkshon di plaka di papel. 2 Suministrá likides na banko ku ta pasando den difikultat.
ta pèrdè maneho monetario komo instrumento, entrada di gobièrnu den forma di señoriahe i di
pèrmit di kambio pa moneda estranhero, i funshon di e outoridat monetario komo finansiadó di
último rekurso ta papia pa su mes. En bista di esaki, no tin motibu ekonómiko konvinsente ni
urgente pa e paisnan dolarisá. Den e tabèl ku ta sigui, ta kompará e benefisio- i kostonan prinsipal
di dolarisashon pa e union monetario di Kòrsou i Sint Maarten, versus e sistema di tasa fiho
konvenshonal ku ta na vigor.
Na final di kuenta, e desishon pa dolarisá ta un desishon polítiko. Pero e ta tambe un desishon ku
por ser tumá solamente despues di a pensa kuidadosamente i komprondé e faktornan
makroekonómiko fundamental enbolbí i e reformanan institushonal, operashonal i struktural ku
dolarisashon lo rekerí. Echo ta ku, for di momento ku a introdusí e tasa di kambio fiho di florin
ku dòler, ni den tempu di Antia Hulandes ni den e union monetario aktual, no tabatin ningun
ahuste di tasa di kambio.
E dokumento di posishon kompleto riba dolarisashon ta disponibel riba wèpsait di Centrale Bank
van Curaçao en Sint Maarten: http://www.centralbank.cw, riba e tab Notes & Advices, bou di e sekshon
Publications.

Willemstad, 30 di sèptèmber 2021
CENTRALE BANK VAN CURACAO EN SINT MAARTEN

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: